Ирэх онд улсын нэгдсэн төсөвт долоон их наяд 159.9 тэрбум төгрөгийн орлого төвлөрөх тооцоотой байна. Энэ нь 2014 оны хүлээгдэж байгаа гүйцэтгэлээс 256.1 тэрбум төгрөгөөр өсгөсөн дүн юм. Ингэснээр ирэх онд төсвийн нийт орлого нь дотоодын нийт бүтээгдэхүүний 29.8 хувьтай тэнцэхээр байна. Ирэх оны орлогыг төлөвлөхдөө татварын орчинг тогтвортой байхаар тооцож, одоогийн хүчин төгөлдөр үйлчилж байгаа хуулийн хүрээнд төлөвлөсөн гэж Сангийн яам мэдээллээ. Сүүлийн жилүүдэд улсын төсвийн нийт орлогын 85-90 хувийг татварын орлого бүрдүүлсээр ирсэн юм. Харин сүүлийн хоёр жилд татварын суурь муудаж, гадаад худалдааны татварын орлого буурч эхэлсэнтэй холбоотойгоор ирэх оны төсөвт татвараас төвлөрүүлэх орлогын хэмжээг энэ оны хүлээгдэж буй гүйцэтгэлээс 300 тэрбум гаруй төгрөгөөр бууруулж, 5.9 их наяд төгрөг болгосон байна. Хэдий тийм боловч энэ нь ирэх оны төсвийн нийт орлого, тусламжийн 82 хувийг бүрдүүлэхээр байгаа ажээ. Харин уул, уурхайн салбараас төсөвт 1.1 их наяд төгрөгийн орлого төвлөрүүлэхээр хуульчлаад байна. Тухайлбал “Оюу Толгой" компани 819.1 мянган тонн зэсийн баяжмал экспортолж, 324.3 тэрбум төгрөгийн татвар төвлөрүүлэхээр тооцжээ. Харин “Эрдэнэт" үйлдвэр 447.5 тэрбум төгрөг, “Эрдэнэс Тавантолгой" зургаан сая тонн нүүрс экспортолж, төсөвт 60.8 тэрбум төгрөгийн татвар төлөх төлөвтэй байна. Мөн ирэх онд Монгол Улс 20 орчим сая тонн нүүрс экпортлохоор төсөвт тусгажээ. Гэхдээ түүхий эдийн ханш тааруу байгаатай холбоотойгоор нүүрсний чанараас хамааран нэг тонныг нь 50-70 ам.доллараар гаргахаар төлөвлөсөн байна. Үүнээс гадна таван сая тонн төмрийн хүдэр, 10 тонн алт экспортод гаргахаар төсвийн төсөлд тусгажээ.

Б.Дуламхорлоо

Холбоо барих: dulamkhorloo.b@bloombergtvmongolia.com

minjma.g@bloombergtvmongolia.com