Украйны Ерөнхийлөгч Петро Порошенко гал зогсоох хэлэлцээрээ цуцлахаар шийдсэн байна. Мөн ОХУ-ын талыг баримтлагчдаас өөрсдийн газар нутгаа буцаан авна гэдгээ мэдэгджээ. Петро Порошенко “Зэвсэгт хүчний Ерөнхий командлагчийн хувьд хэт нэг талыг баримталсан гал зогсоох шийдвэрийг үргэлжлүүлэхгүй байхаар шийдлээ. Украйны газар нутгийн бүрэн бүтэн байдал, аюулгүй байдал болон иргэдийнхээ амь насыг хамгаалахын тулд бид өөрсдийгөө террористуудаас хамгаалаад зогсохгүй дайралт хийх зайлшгүй шаардлагатай болж байна. Зэвсэгт хүчин, Үндэсний гвард, Хилийн хамгаалах албаныхан болон Аюулгүйн албаныхан бүгд холбогдох тушаалуудыг авсан байгаа. Газар нутгийнхаа бүрэн бүтэн байдлыг хамгаалахдаа дахин гал зогсоох хэлэлцээрээр хязгаарлагдахгүй. Бид довтолж өөрсдийн газар нутгаа чөлөөлөх болно” гэж мэдэгдсэн байна. Түүнчлэн тэрбээр "Гал зогсоох хэлэлцээр хэрэгжих хугацаанд ОХУ-ын талыг баримтлагчид 100 гаруй удаа хэлэлцээрийг зөрчсөн" гэж онцолжээ. Үүнээс гадна Германы Канцлер Ангела Меркель, Францын Ерөнхийлөгч Франсуа Олланд болон ОХУ-ын Ерөнхийлөгч В.Путин нартай асуудлыг хэрхэн шийдвэрлэх талаар санал солилцжээ. Энэ үеэр ОХУ болон Украйны хамтарсан хилийн эргүүл гаргахад бэлэн байгаагаа ОХУ-ын Ерөнхийлөгч В.Путин мэдэгдсэн байна.

Д.Хаш-эрдэнэ 

Холбоо барих: khasherdene.d@bloombergtvmongolia.com

minjma.g@bloombergtvmongolia.com