Төрийн байгуулалтын байнгын хорооны хуралдаанаар 2016 оны Төсвийн тухай, Хүний хөгжил сангийн 2016 оны төсвийн тухай, Нийгмийн даатгалын сангийн 2016 оны төсвийн тухай хуулийн төслүүдийн хоёр дахь хэлэлцүүлгийг хийлээ. Хуулийн төслүүдтэй холбогдуулан зарим гишүүдээс гаргасан зарчмын зөрүүтэй саналын үндэслэлийг сонссоны дараа санал хурааж шийдвэрлэлээ. Тухайлбал Улсын Их Хурлын гишүүн А.Бакей Улсын Их Хурлын Тамгын газрын 2016 оны төсвийн урсгал зардлаас 667.1 сая төгрөгийг хасч, тэр хэмжээгээр нь хөрөнгө оруулалтын зардлыг нэмэх санал гаргасан нь хуралдаанд оролцсон гишүүдийн дийлэнх, олонхийн дэмжлэгийг авлаа. 2016 оны төсвийн төслийн хувьд орлого 6.8 их наяд төгрөг, зарлага 7.2 их наяд төгрөг байхаар тооцож, төсвийн алдагдлыг дотоодын нийт бүтээгдэхүүний 3 хувьд байлгахаар тусгаж өгсөн юм. Өөрөөр хэлбэл төсвийн төслийг боловсруулахдаа эдийн засгийн өсөлтдөө тулгуурлаж 2017 оноос үр дүн нь илүүтэй илрэх төслийг боловсруулсанаа Сангийн сайд мэдээлсэн байна. Мөн Засгийн газарт бүтцийн өөрчлөлт хийхээр тусгаж, ирэх 2016 оны наймдугаар сарын нэгнээс хэрэгжүүлэхээр авч үзжээ. Ингэхдээ одоо байгаа яамдын тоог цөөлж 9 болгох, ирэх оны нэгдүгээр сарын нэгнээс зарим агентлагийг татан буулгах, нэгтгэхээр төлөвлөжээ. Гэхдээ Төрийн байгуулалтын байнгын хорооны хуралдааны үеэр УИХ-ын гишүүн Н.Алтанхуяг Үндэсний Статистикийн Хороо, Улсын Бүртгэлийн Ерөнхий Газрыг нэгтгэх тухай заалтыг хуулийн төслөөс хасч, эдгээр байгууллагыг хуучин бүтцээр нь ажиллуулах санал гаргасан байна. Энэхүү саналыг оролцсон гишүүдийн олонх дэмжжээ.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com