Австрали улс 2021 оны санхүүгийн жилийн уул уурхай, эрчим хүчний экспортын орлогын төсөөллөө нэмэгдүүллээ. Тус улсын экспортын гол бүтээгдэхүүнүүдийн нэг болох төмрийн хүдрийн үнэ огцом өсөж байгаа нь үүнд голлон нөлөөлсөн байна.

2021 оны зургаадугаар сараар эцэслэх жилд нийт экспортын орлогыг 279 тэрбум австрали доллар буюу 212 тэрбум ам.доллар болно гэж тооцоолжээ. Өөрөөр хэлбэл өмнөх улиралд тооцоолж гаргасан төсөөллөөс есөн хувиар нэмэгдүүлсэн байна. Тус улсын төмрийн хүдрийн экспорт 2021 оны санхүүгийн жилд бүх цаг үеийн дээд түвшинд хүрэх төлөвтэй байгаа аж. Энэ нь БНХАУ-д төмрийн хүдрийн эрэлт огцом өсөж, Бразилын нийлүүлэлт тасалдаж байгаатай холбоотой юм байна.

Харин нүүрсний хувьд БНХАУ, Австралийн харилцаа муудаж буйн улмаас БНХАУ-ын тал Австралийн нүүрсэнд хориг тавиад байгаа юм. Үүнтэй холбоотойгоор Австрали улс нүүрсний экспортын орлогын төсөөллөө бууруулжээ.

Б.Батцэцэг

Холбоо барих: battsetseg.b@bloombergtvmongolia.com

minjma.g@bloombergtvmongolia.com