БНХАУ-ын Далянийн Таваарын бирж дотоод журамдаа өөрчлөлт оруулснаар төмрийн хүдрийн фьючерс үнэ наймдугаар сараас хойш хамгийн өндөр дүнгээр буурлаа.

Төмрийн хүдрийн үнэ хэт өндөр байгаа тул тус улсын ган үйлдвэрлэгчид “Rio Tinto”, “BHP” зэрэг компанийн төлөөлөлтэй уулзаж, үнэ тодорхойлох аргачлалыг өөрчлөх хүсэлт гаргаад байгаа аж. Мөн үнийг тогтоон барих асуудлаар Засгийн газартаа хандсан байна. Улмаар Далянийн Таваарын биржийн журмыг чангалсан нь үнэ буурахад нөлөөлж байгаа ажээ.

Харин нийлүүлэлт талдаа Бразилын “Vale” компанийн уурхайд осол гарсны дараа тус компани төмрийн хүдрийн гарцын төлөвтөө өөрчлөлт оруулсан юм.

Мөн Австрали улсын төмрийн хүдрийн экспорт өнгөрсөн долоо хоногт 15.8 сая тонн болж буурсан байна. Үүнээс өмнөх долоо хоногт 16.2 сая тонныг экспортлоод байжээ.

Төмрийн хүдрийн үнэ өнгөрсөн долоо хоногт өсөөд байв. Харин лхагва гарагийн арилжаагаар 5.4 хувиар буурч, тонн нь 1030 юань болоод байна.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com