Монгол Улсын Засгийн газар, Азийн хөгжлийн банктай хамтран хэрэгжүүлэх төлбөрийн системийн шинэчлэл төслийн зээлийн хэлэлцээрийн төслийг УИХ-д өргөн бариад байна. Монгол Улсын Засгийн газар Азийн хөгжлийн банктай байгуулсан хэлэлцээрийн үр дүнд төслийн 20 сая ам.долларын санхүүжилтийг Азийн хөгжлийн банкны энгийн эх үүсвэрийн сангаас гаргахаар болжээ. Төслийг энэ оны зургадугаар сараас 2017 оны зургадугаар сар хүртэл гурван жилийн хугацаанд хэрэгжүүлэхээр хоёр тал тохиролцоод байна. Зээлийн санхүүжилтийг Лондонгийн банк хоорондын захын зээлжих хүүд суурилсан хувьсах хүүтэйгээр 20 жилийн хугацаанд эргэн төлөх нөхцөлтэй авахаар хэлэлцээ хийжээ. Мөн эхний таван жилд үндсэн өрийн төлбөрөөс чөлөөлөгдөх нөхцөлтэй байгаа юм. Төслийн хүрээнд 10 багц ажил хийхээр төлөвлөснөөс цахим худалдаа эрхэлдэг бүх байгууллагууд Монголбанкны үндэсний цахим гүйлгээний төвтэй холбогдож, нэгдсэн портал цахим хуудас бий болгох юм байна. Мөн хосолмол картыг нийтийн тээврийн системд нэвтрүүлж, зорчигч бэлэн мөнгөтэй харьцах шаардлагагүй болохоос гадна банкуудын мобайл банкны үйлчилгээ рүү хандах нэгдсэн цонхтой болж, хоорондоо гүйлгээ хийх боломжтой болох аж. Эдгээр ажлын үр дүнд бэлэн мөнгөний хэрэглээ багасч, бэлэн бус төлбөрийн шинэ хэрэгслийг хөгжүүлж, одоогийн ашиглаж байгаа төлбөрийн систем улам боловсронгуй, найдвартай болно гэж Монгол Улсын Засгийн газар үзжээ. 

З.Энхболор 

Холбоо барих: enkbolor.z@bloombergtvmongolia.com 

minjma.g@bloombergtvmongolia.com