Дэлхийн ихэнх улс оронд 5G сүлжээ нэвтрээгүй байгаа ч Засгийн газрууд, компаниуд аль хэдийн 6G технологийг хөгжүүлэхээр хамтран ажиллаж байна.

БНХАУ 2020 оны 11 дүгээр сард 6G сүлжээний туршилт хийхээр хиймэл дагуул хөөргөөд байгаа юм. Мөн “Huawei” компани Канадад 6G сүлжээний судалгааны төв байгуулсныг Канадын хэвлэлийн байгууллагууд мэдээллээ. БНХАУ-ын харилцаа холбооны “ZTE”, “China Unicom” зэрэг томоохон компаниуд энэхүү технологийг хөгжүүлэхээр хамтран ажиллаж эхэлсэн байна.

АНУ-ын Засгийн газрын хувьд Умард Америкт 6G технологийг түрүүлж хэрэглээнд нэвтрүүлэх зорилгоор “Next G Alliance” нэртэй холбоог байгуулжээ. Энэхүү холбоог 2020 оны аравдугаар сард “ATIS” байгууллагаар дамжуулан анх үүсгэж байсан аж. Тус холбоонд “Apple”, “AT&T”, “Qualcomm”, “Google”, “Samsung Electronics” зэрэг технологийн томоохон компаниуд нэгдэн оржээ.

Харин Европын Холбооны 6G утасгүй сүлжээний төслийг “Nokia” компани ахалж, “Ericsson AB”, “Telefonica” зэрэг компани нэгдсэн байна. Мөн их сургуулиуд оролцож байгаа юм.

Хэдий тийм боловч одоогийн хурдаараа ойрын 15 жилд 6G сүлжээний технологи гарах магадлал бага байгааг “Frost & Sullivan” компани онцолсон байна. 6G сүлжээ нь 5G сүлжээний дээд хурднаас дор хаяж 100 дахин хурдан, 10 дахин бага хоцрогдолтой ч одоогоор 6G сүлжээний ачааллыг дааж чадах чип гараагүй байгаа юм.

Ж.Зоригт

Холбоо барих: zorigt.j@bloombergtvmongolia.com

minjma.g@bloombergtvmongolia.com