“Тройка” буюу Европын комисс, Европын Төв банк, Олон улсын валютын сангийн удирдлагууд Грек улсад дараагийн ээлжийн санхүүгийн тусламж олгох шийдвэр гаргасан байна. Энэхүү шийдвэрийн дагуу Европын Холбооны улсын Засгийн газрууд 6.8 тэрбум евро буюу 8.7 тэрбум ам.долларын санхүүгийн тусламжийг Грек улсад олгохоор боллоо. Үүнээс 2.5 тэрбум еврог Евробүсийн тогтвортой байдлын сангаас, 1.5 тэрбум еврог Европын Төв банкнаас гаргахаар болжээ. Грекийн Ерөнхий сайд Антонис Самарасын эвслийн Засгийн газар уг тусламжийн хариуд эдийн засгийн шинэчлэл хийж, төсвийн таналтыг үргэлжлүүлэн хэрэгжүүлэх шаардлагатай юм байна. Грект шаардлагатай тусламжийг олгож байгаа Герман тэргүүтэй Европын Холбооны улсууд тус улсын эдийн засаг дампуурах, эсвэл Евробүсээс гарахыг хүсэхгүй байгаа юм. Европын хамгийн том эдийн засагтай улс болох Германы сангийн сайд Вольфганг Шойбле Брюссельд болсон Евробүсийн Сангийн сайд нарын уулзалтын дараа "Грект болж бүтэж байгаа нааштай зүйлүүд олон байна. Гэхдээ зарим ажлуудыг хойшлуулсан. Цаашдаа шаардлагыг биелүүлсэн тохиолдолд мөнгөн тусламж олгох зарчмыг баримтлах нь зүйтэй" гэж Грекийн талаарх байр сууриа илэрхийлжээ. Грекийн эрх баригчид санхүүгийн тусламж авахын тулд энэ оны эцэс гэхэд Төрийн албаны дөрвөн мянган ажлын байранд цомхотгол хийхээ амлаад байгаа юм. Евробүсийн эдийн засгийн хямрал, тусламж авч байгаа Евробүсийн таван улсын нэг болох Португалийн улстөрийн тогтворгүй байдал зэрэг хүчин зүйлүүд нь зээлдүүлэгчдийн хувьд Грек гал алдаж, эдийн засаг нь дахин хямрахаас сэргийлэх шаардлагыг нэмэгдүүлээд байна. “Тройка” буюу Европын Комисс, Европын Төв банк, Олон улсын валютын сангаас Грекийн эдийн засгийн төлвийг тодорхойгүй гэж дүгнэсний дээр тус улсын эрх баригчид төрийн албыг илүү цомхон, чадварлаг болгох төлөвлөгөөгөө хангалттай биелүүлэхгүй байна гэж үзэж байгаа аж. Түүнчлэн “Тройка” эрүүл мэндийн салбарын үрэлгэн зарцуулалтыг хянах, мөн татварын шинэчлэлт зэрэг ажлууд дээр бодит алхам хийхийг Грекийн эвслийн Засгийн газраас шаардаад байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com