Япон болон БНСУ-д “Covid-19”-ийн халдварын тархалт эрчимжиж, өдөрт илэрч буй тохиолдол 700-2000 хүрээд байна.

Япон улсын нийслэл Токиод “коронавирус”-ийн халдварын тохиолдол сүүлийн хоёр сард бүртгэгдээгүй хамгийн өндөр дүнгээр нэмэгджээ. 10 гаруй сая хүн амтай тус хотод лхагва гарагт 555 шинэ тохиолдол бүртгэгдсэн нь хоёрдугаар сараас хойших хамгийн өндөр дүн болсон байна. Иймд Токио хотын захиргаа эргэн хатуу арга хэмжээ авахаар төлөвлөөд байгаа аж. “Шинжээчидтэй хэлэлцэж ямар арга хэмжээ авах талаар шийдвэр гаргана” гэж Токио хотын захирагч Койкэ Юрико мэдэгджээ.

Осака хотод хоёрдугаар сард онц байдлын дэглэм тогтоосноос хойш халдварын тохиолдлын тоо эрс нэмэгдсэн байна. Тухайлбал: хүн амынхаа тоогоор Токиогоос хоёр дахин бага хэдий ч өдөрт 878 шинэ тохиолдол бүртгэгдээд байгаа аж.

Харин БНСУ-д сүүлийн 24 цагийн байдлаар 700 шинэ тохиолдол бүртгэгдээд байна. Энэ нь нэгдүгээр сараас хойших хамгийн өндөр үзүүлэлт боллоо. Ингэснээр “коронавирус”-ийн халдварын батлагдсан нийт тохиолдлын тоо 107 мянга давж, 1758 хүн нас бараад байгаа аж. Сүүлийн долоо хоногт тус улсад халдварын тохиолдол өдөрт 400-500 бүртгэгдэж байгаа нь дөрөв дэх давлагаа эхэлж магадгүй гэсэн болгоомжлолыг нэмэгдүүлж байна.

Ц.Бадмаараг

Холбоо барих: badmaarag.ts@bloombergtvmongolia.com

minjma.g@bloombergtvmongolia.com