Тоног төхөөрөмжийн эвдрэлийн улмаас дэлхийн хамгийн том биржүүдийн нэг Токиогийн Хөрөнгийн биржийн пүрэв гарагийн арилжааг зогсоолоо. Биржийн толгой компани ямар төхөөрөмжид доголдол гарсныг тодорхой мэдээлээгүй. Шалтгааныг нь судалж байна. Энэ талаар биржийн зүгээс хэвлэлийн бага хурал хийж, маргааш арилжааг үргэлжлүүлэхээр зорьж байгааг мэдээлсэн. Японы Засгийн газар "Биржийн арилжаа зогссонд харамсаж байгаа"-гаа илэрхийлээд байна. 2010 оноос хойш ашиглаж байгаа Arrowhead систем нь 2011 оны хүчтэй газар хөдлөлт, цунамигийн үеэр ч асуудалгүй ажиллаж байсан. Тухайн үед Токиогийн Биржийн барилгад чичиргээ мэдрэгдсэн ч арилжаа хэвийн үргэлжилсэн юм. Харин 2012 онд компьютерын саатлын улмаас хэдэн зуун үнэт цаасны арилжааг түр зогсоож байсан. Гэхдээ дижитал системд шилжсэнээс хойш биржийн ажиллагааг бүтэн өдөр зогсоож байгаагүй юм.

Б.Дашням

Холбоо барих: dashnyam.b@bloombergtvmongolia.com

uyanga.m@bloombergtvmongolia.com