2018 оны эхний долоон сарын байдлаар суудлын болон ачааны автомашины импорт өмнөх оны мөн үеэс өссөн дүнтэй байна. Ялангуяа суудлын автомашины импорт өмнөх оны мөн үеэс найман хувиар өсөж, 34 мянга 882 болсон бол ачааны автомашины импорт өмнөх оноос 75 хувиар өсжээ. Харин суудлын автомашины импортын мөнгөн дүн 39 хувиар өссөн бол ачааны автомашины импортын мөнгөн дүн өмнөх оноос хоёр дахин өсөж, 177.7 сая ам.долларт хүрсэн байна.

Эдийн засгийн өсөлт нэмэгдэж байгаатай холбоотойгоор автомашины импорт ийнхүү өсөлттэй байгаа аж. Уул уурхайн салбарын идэвхжлийг дагаад ачааны автомашины импорт өсөж байгааг импортлогч компаниуд онцоллоо. Мөн дотоодын тансаг автомашины зэх зээл улам тэлэх боломжтой гэж тансаг автомашин үйлдвэрлэгч компаниуд тодорхойлж байна. Дотоодын зах зээлд тансаг ангиллын 2000 гаруй автомашин жилд борлуулагддаг гэсэн судалгаа байдаг бөгөөд сүүлийн жилүүдэд “Porsche”, “Audi”, “Jaguar” зэрэг брэндүүд албан ёсоор худалдаалагдах болж, тансаг автомашины борлуулалтын өрсөлдөөн нэмэгдэж байна.

Сонирхуулахад, тансаг автомашины зах зээлийн гуравдагч том тоглогч болох “Infiniti” брэнд Монголын замд автомашинаа туршиж эхэлсэн бол “BMW” брэндийн албан ёсны дилер ирэх оноос үйл ажиллагаагаа явуулж эхлэх товтой байна.

Э.Төгөлдөр

Холбоо барих: tuguldur.e@bloombergtvmongolia.com

uyanga.m@bloombergtvmongolia.com