"Рио Тинто" компанийн хувьцаа эзэмшигчдийн хурлаар тус компанийн Гүйцэтгэх захирал Сэм Уолш "Бид Монгол Улсын Засгийн газарт их хэмжээний татвар төлсөн. "Оюу Толгой" орд Монгол Улсын дотоодын нийт бүтээгдэхүүний 36 хувийг бүрдүүлнэ" гэж мэдэгджээ. 2012 онд үйл ажиллагааны зардал нь 17.4 тэрбум ам.доллар хүрээд байсан "Рио Тинто" компани ирэх хоёр жилийн дотор үйл ажиллагааны зардлаасаа таван тэрбум ам.доллар хэмнэхээр төлөвлөж байгаа аж. "Рио Тинто"-ийн хувьцаа эзэмшигчид "Оюу Толгой" төсөл амжилттай хэрэгжинэ гэдэгтэй санал нэг байгаа бөгөөд төслийг бүрэн хүчин чадлаар нь ажиллуулна гэдэгт итгэлтэй байгаагаа" тус компанийн Гүйцэтгэх захирал Сэм Уолш илэрхийлсэн байна. Түүнчлэн Монгол Улсын Засгийн газартай хийж байгаа хэлцлийн үйл явц эерэг байгааг онцолсноос гадна шийдсэн, шийдвэрлэх шаардлагатай байгаа асуудлууд байгааг ч мөн дурджээ. 

Мөн тэрбээр байгаль орчны асуудлаар Их Британийн "Guаrdian" сонинд өгсөн ярилцлагадаа "Оюу Толгой"-н уурхайн ашиглалтад гадаргын усыг бус гүний усыг ашиглана" гэж дурджээ. "Рио Тинто" компанийн хувьд энэ онд дөрвөн асуудалд анхаарч ажиллах бөгөөд өсөлтийг хангах зорилгоор хөрөнгийн зохицуулалтад хатуу хяналт тавьж, зарим нэг шаардлагагүй хөрөнгийн зарцуулалтаа танах бодлого баримталж байгаа ажээ.