Лхагва гарагт ОХУ-ын Гадаад хэргийн сайд Сергей Лавров "АНУ-ын тал Сирийн асуудлаар дээд хэмжээний уулзалт, хэлэлцээ хийхээс татгалзсан" гэдгийг онцоллоо. Сергей Лавров “Бид Вашингтон руу ОХУ-ын Ерөнхий сайд Дмитрий Медведев тэргүүтэй зэвсэгт хүчин, батлан хамгаалах болон Гадаад хэргийн яамны төлөөллийг илгээхэд бэлэн байгаа. Гэхдээ өнөөдөр АНУ-аас Москва руу төлөөлөгчдөө илгээхгүй, мөн манай дипломат төлөөлөгчдийг хүлээн авахгүй гэсэн албан ёсны мэдэгдэл хүлээж авлаа” хэмээн мэдэгдсэн байна. Мөн тэрбээр тус улсын Парламентад тавьсан илтгэлдээ "Барууны орнууд Сири зэрэг мөргөлдөөнтэй бүс нутагт хөндлөнгөөс оролцохыг хориглосон НҮБ-ын тогтоолыг хэлэлцэхээс зайлсхийж байна" гэж шүүмжилсэн юм. Албан ёсны эх сурвалжийн мэдээлснээр лхагва гарагт ОХУ-ын байлдааны онгоцууд Сирийн хамгийн том хот болох Халебын ойролцоо орших зэвсэгт бүлэглэлийн байрыг устгасан байна. ОХУ-ын тал Сирийн Засгийн газрын давшилтад дэмжлэг үзүүлж хоёр долоо хоногийн турш агаарын цохилт хийж байгаа юм.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com