Цар тахал үл хөдлөх хөрөнгийн зах зээлд хүчтэй нөлөө үзүүлж байна. Ялангуяа АНУ-ын оффисын барилгын зах зээл уналтаас гарч чадахгүй байгаа аж. Сан Франциско хотод оффисын барилгын зах зээл бүх цаг үеийн доод түвшинд хүрч, буурчээ.

Тус хотод оффисын хоосон барилгын тоо эрс нэмэгдэж, 2020 оны эцсээр 16.7 хувьд хүрсэн байна. Энэ нь өмнөх оныхоос 11 хувиар өссөн үзүүлэлт болжээ.

Бизнесүүд ажилтнуудаа зайнаас ажиллуулах хандлага давамгайлах болсноор оффисын барилгын хэрэгцээ буурсан аж. Тэр дундаа түрээсийн төлбөр өндөр Нью-Йорк, Сан Франциско зэрэг хотод хоосон барилга, байгууламжийн тоо нэмэгдсээр байгаа юм байна.

Харин орон сууцны борлуулалт идэвхтэй хэвээр байна. Моргейжийн зээлийн хүү түүхэн доод түвшинд хүрснээр орон сууцны борлуулалт нэмэгдэж, үнэ нь өсөөд байсан юм. Хэдий тийм боловч худалдан авалтын чадвар буурснаар сүүлийн хэдэн сард үнийн өсөлт саарч эхэллээ.

Нэг өрхийн амины орон сууцны үнэ хамгийн сүүлд 13.8 хувиар өссөн байна. Оргил үедээ буюу өнгөрсөн оны долоодугаар сарын эцсээр 16.5 хувиар өсөж байжээ.

Одоогоор АНУ-д 30 жилийн хугацаатай моргейжийн зээлийн хүү 2.65 хувь болж буураад байгаа юм. Зээлийн хүү дахин буурах эсэх нь эргэлзээтэй байгааг салбарын шинжээчид онцолж байна.

С.Өнөрсайхан

Холбоо барих: unursaikhan.s@bloombergtvmongolia.com

minjma.g@bloombergtvmongolia.com