Сангийн яам, Монголбанк, Санхүүгийн Зохицуулах Хорооны удирдлагууд багтдаг "Санхүүгийн тогтвортой байдлын зөвлөл"-ийн ээлжит хуралдаан боллоо. Хурлаар 2015 оны эдийн засгийн төлөв, хандлага, авч хэрэгжүүлэх арга хэмжээг хэлэлцлээ. Сүүлийн гурван жилийн хугацаанд гадаад валютын орох урсгал Монгол Улсын дотоодын нийт бүтээгдэхүүний 72 хувьтай тэнцэх хэмжээгээр дутагдсан нь эдийн засаг хүндрэхэд нөлөөлсөн гэж "Санхүүгийн тогтвортой байдлын зөвлөл" дүгнэжээ. Тиймээс валютын орох урсгалыг нэмэгдүүлэх арга хэмжээ нь эдийн засаг агшихаас урьдчилан сэргийлэх, хувийн хэвшилд ирэх дарамтыг бууруулах, иргэдийн хуримтлал хадгаламжийг хамгаалах, ажлын байрыг хадгалахад чиглэх хэрэгтэй байгааг онцолсон байна. Мөн харилцан уялдаатай бодлогын өөрчлөлт хийх нь төлбөрийн тэнцэл ашигтай гарч, эдийн засаг тогтворжиход дэмжлэг болно гэж үзжээ. Эдгээр дүгнэлтэд үндэслэн макро бодлогын өөрчлөлтийн нэгдсэн төлөвлөгөө боловсруулан хэрэгжүүлэхийг Засгийн газарт зөвлөмжөөр хүргүүлэхээр тогтсон байна. Үүнд гадаад валютын орох урсгалыг нэмэгдүүлэх, төсвийн зохистой бодлого хэрэгжүүлэх, эдийн засгийн бүтцийн шинэчлэлийг эрчимжүүлэх гэсэн гурван арга хэмжээ багтаж байгаа талаар "Санхүүгийн тогтвортой байдлын зөвлөл"-өөс мэдээллээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com