Нэг тонн коксжих нүүрсний аравдугаар сарын экспортын дундаж үнийг 119.66 ам.доллар, сул коксжих нүүрсний үнийг 77.13 ам.доллароор тооцож, өмнөх сарынхаасаа бууруулсан талаар Сангийн яам мэдээллээ.

Гол экспортлогч компаниудын нэг “Mongolia Energy Corporation” Хөшөөтийн нүүрсийг нэг тонн тутамд нь 70 гаруй ам.доллароор борлуулж байгаа талаар мэдээлсэн юм. Коксжих нүүрсний үнэ буурах эрсдэл байгаа ч сул коксжих нүүрсний үнэ тогтвортой байх төлөвтэй гэж Нарийнсухайтаас экспорт хийж байгаа “Саусгоби сэндс” ХХК таамаглаж байна. Коксжих нүүрний нийлүүлэлт нэмэгдэхтэй зэрэгцээд 2020 онд үнэ буурна гэж “Fenwei Energy”-ийн шинжээч таамаглаж байна.

Харин нэг тонн цайрын аравдугаар сарын экспортын дундаж үнийг 2319.16 ам.доллар гэж Сангийн яам тооцоолсон байна. Энэ нь өмнөх сарынхаас хоёр хувиар нэмэгджээ. Цайрын үнэ оны үлдсэн хугацаанд нэмэгдэнэ гэж найдаж байгаа талаар гол экспортлогч "Цайрт минерал" ХХК мэдэгдлээ.

Зэсийн аравдугаар сарын экспортын дундаж үнийг 0.6 хувиар нэмж, 5744.99 ам.доллароор тооцсон байна. Гол экспортлогчдын нэг “Оюу Толгой”-ийнн хөрөнгө оруулагч “Rio Tinto” компани ойрын таван жилд зэсийн зах зээл тэнцвэртэй байна гэж харж байгаа юм. Хэдий тийм боловч “Худалдааны дайн”-аас үүдэлтэйгээр сүүлийн хагас жилд зэсийн үнэ Лондоны Металлын биржид 10 гаруй хувиар буурсан байна.

Нэг тонн хөнгөн цагааны аравдугаар сарын экспортын үнийг есөн ам.доллароор нэмж, 1749.23 болгон тооцоолжээ. Цаашид хөнгөн цагааны нийлүүлэлт эрэлтээсээ давж өсөх учир үнэ буурна гэж “Goldman Sachs” таамагласан байна. Ойрын зургаан сард тонн тутмынх нь үнэ 1575 ам.доллар руу буурна гэсэн нь одоогийн спот ханшаас 200 орчим ам.доллароор бага дүн юм.

Т.Элиса | @elisa_elisat

Холбоо барих: elisa.t@bloombergtvmongolia.com

minjma.g@bloombergtvmongolia.com