Румын улсын эрдэмтэн, компьютерийн шинжлэх ухааны профессор Даниела Рас мэс ажилбарыг орлох эмийн роботыг зохион бүтээсэн байна. Тодруулбал энэхүү роботыг залгиснаар гэдсэн доторх гадны биетийг устгаж өвчин, зовиурийг илрүүлж, улмаар эмчлэх боломжтой болох юм. Ердөө хоёр сантиметрийн урттай, 2.5 грамм эм агуулсан энэхүү робот нь хүний гэдсэнд ороод 1-2 минутын дотор задардаг бол ажиллагаа дууссаны дараа яг л хоол шиг устаж үгүй болдог байна. Түүний мэдээлснээр энэхүү робот нь 100 ам.доллар ч хүрэхгүй өртгөөр бүтдэг бол үүнийг удирдах төхөөрөмж нь илүү өндөр үнээр бүтээгдэх юм байна. Даниела Рас болон түүний баг 2015 оны зунаас эхлэн энэхүү роботыг анагаах ухааны салбарын хэрэглээнд нэвтрүүлэхээр ажиллаж эхэлжээ. АНУ-ын Үндэсний шинжлэх ухааны сангийн санхүүжилтээр хийгдэж буй энэхүү төсөл нь одоогийн байдлаар хиймэл гэдсэнд туршигдаад байгаа юм. Харин цаашид гахайнд туршиж эхлэхээр төлөвлөж байгаагаа Даниела Рас мэдэгджээ.

О.Намуун

Холбоо барих: namuun.o@bloombergtvmongolia.com

sodgerel.kh@bloombergtvmongolia.com