“Рио Тинто” компанийн бондын арилжаан дахь эрсдэл багасч, ханш нь гол өрсөлдөгч болох “BHP Billiton” компанийн бондтой ойролцоо түвшинд хүрлээ. “Рио Тинто” компанийн санхүү хариуцсан захирал Крис Линч төмрийн хүдрийн зах зээлд тулгуурлан компанийнхаа өрийг багасгахаар зорьж байгаагаа мэдэгдсэн нь ийнхүү бондын арилжаанд эергээр нөлөөлжээ. 12 дугаар сарын 4-нд “Рио Тинто”-ийн бондын ханш 75.2 суурь нэгж болж, сүүлийн гурван жилийн хугацаан дахь хамгийн бага түвшинд хүрсэн байна. Энэ нь “BHP Billiton” компанийн бондын нэгжээс 11 суурь нэгжээр илүү үзүүлэлт юм. Харин 12 дугаар сарын 9-ний байдлаар хоёр компанийн бондын ханш дахь зөрүү 20 суурь нэгж болжээ. “Рио Тинто”-ийн бондын ханш сүүлийн зургаан сарын хугацаанд 38 суурь нэгжээр буурсан байна. Үүнтэй зэрэгцээд “Standard & Poor’s” агентлаг “Рио Тинто”- ийн зэрэглэлийг А болгосон юм. Энэ нь “BHP Billiton” компанийнхаас хоёр түвшин доогуур зэрэглэл ажээ. “Рио Тинто” компанийн гол ашиг нь төмрийн хүдрийн салбарт төвлөрдөг бөгөөд өнгөрсөн онд татварын өмнөх орлогынхоо 78 хувийг энэ салбараас олсон байна. Харин БНХАУ-ын эрэлт ихсэхийн хэрээр түүхий эдийн зах зээл дээр төмрийн хүдрийн ханш тавдугаар сараас хойш өсч байгаа юм. Гэвч “Рио Тинто”-ийн өр 22 тэрбум ам.долларт хүрсэн нь бондод нь эрсдэл үүсгээд байна. Тиймээс үүнийг багасгах зорилгоор тус компани 2015 он гэхэд хөрөнгө зарцуулалтаа хоёр дахин бууруулахаар зорьж, төмрийн хүдрийн салбарт төвлөрөхөөр зорьж байгаа ажээ. “Энэ нь бондын зах зээлд эерэг хандлагыг бий болгох стратеги” гэж Австралийн Үндэсний банкны шинжээч Майкл Буш дүгнэлээ. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com