Өнөөдөр “Оюу толгой” компанийн Төлөөлөн Удирдах Зөвлөл хуралдаж эхлээд байна. Энэхүү хурлаар “Оюу толгой” компанийн 2013 оны ажлын гүйцэтгэл, 2014 оны төлөвлөлөөг авч хэлэлцэнэ. Мөн санхүүжилт нь зогсоод байгаа далд уурхайн санхүүжилтийг хэрхэн шийдвэрлэх талаар хүлээлт үүсээд байна. “Turquoise Hill Resources” компани далд уурхайн санхүүжилтийн асуудлаар хэлэлцээ үргэлжилж байгаа гэж мэдэгдээд байгаа юм. “Рио Тинто” болон “Turquoise Hill Resources” компани ирэх оны нэгдүгээр сарын 15-наас өмнө үйл ажиллагаа болон түр хугацааны санхүүжилтийг шийдвэрлэсэн байхаар төлөвлөөд байгаа ажээ. Энэ мягмар гарагт “Оюу толгой” компанийн санхүү, аудит, ханган нийлүүлэлт болон хүний нөөцийн дэд хороод хуралдсан байна. “Оюу толгойн” Төлөөлөн Удирдах Зөвлөлийн хурлын талаарх мэдээллийг пүрэв гарагт олон нийтэд мэдээлнэ гэж “Эрдэнэс Оюу Толгой” компаниас мэдээллээ. 2013 онд “Оюу толгой” компани 72-77 мянган тонн зэсийн баяжмалыг үйлдвэрлэхээр төлөвлөөд байгаа аж. Ингэснээр энэ оны эцэс гэхэд “Оюу толгой” орд бүрэн хүчин чадлаараа ажиллах боломжтой болж байгаа юм байна. Харин 2014 онд 150-175 мянган тонн зэсийн баяжмал, 700-750 мянган унци алт үйлдвэрлэхээр төлөвлөж байгаагаа “Turquoise Hill Resources” компани мэдээлээд байна. Түүнчлэн “Оюу толгой” компанийн шинэ Техник Эдийн Засгийн Үндэслэлийг ирэх оны эхний хагаст боловсруулж дуусахаар ажиллаж байгаа юм. 

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com