Монгол Улсын Засгийн газар “Оюу Толгой”-д чухал шаардлагатай баталгаануудыг гаргаж өгсөн гэж “Эрдэнэс Оюу Толгой” компаниас мэдээллээ. Тухайлбал Засгийн газар олон улсын банк санхүүгийн байгууллагуудад баталгаа гаргаж өгөхөд татгалзах зүйлгүй гэдгээ Дэлхийн банкны "Хөрөнгө Оруулалтыг Баталгаажуулах Олон Талт Агентлаг"-т албан ёсоор мэдэгдсэн байна. Хөрөнгө оруулагчдад улс төрийн эрсдэлийн баталгаа болж өгдөг тус агентлагийн баталгаа нь төслийн санхүүжилтэд чухал болохыг “Turquoise Hill Resources” компани илэрхийлжээ. Үүнээс гадна “Оюу Толгой”-ийн ТЭЗҮ-ийн тодотголыг Эрдэс Баялгийн Мэргэжлийн Зөвлөл баталгаажуулсан болохыг “Эрдэнэс Оюу Толгой” компаниас мэдээлсэн байна. Дотоод эх сурвалж “ТЭЗҮ-ийн тодотголд хувь нийлүүлэгчдийн хооронд маргаан гарах гол үндэс болсон зардлыг маш нарийн тусгаж өгсөн” гэдгийг онцолж байгаа юм. Дубайн төлөвлөгөөний дагуу гаргасан эдгээр баталгаа нь хөрөнгө оруулагч талд олон улсын банк санхүүгийн байгууллагуудтай яриа хэлэлцээгээ урагшлуулахад түрхэц үзүүлэх учиртай. Төлөвлөгөөгөөр энэ оны сүүлд дөрвөн тэрбум ам.долларын төслийн санхүүжилтийг баталгаажуулна. “Эрдэнэс Оюу Толгой” компанийн Гүйцэтгэх захирал Д.Ганболдын зүгээс "Шийдэмгий алхамууд нь Монголын Засгийн газар дэлхийн хэмжээний ордын ашиглалтыг түргэн хугацаанд эхлүүлэх хүсэлтэй байгааг батлаад зогсохгүй бизнест нээлттэй гэдгийг харуулж байна" гэж онцолсон байна. 5-7 жил үргэлжлэх далд уурхайн бүтээн байгуулалт ирэх оны дунд үеэс эхлэх хүлээлттэй байгаа юм.

Д.Хаш-Эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com