“Европын сэргээн босголт, хөгжлийн банк” болон “Австралийн экспортын агентлаг” Оюутолгойн гүний уурхайг санхүүжүүлэх зээлийн баталгаагаа сунгахаар болсон байна. “Оюу Толгойн” хувь нийлүүлэгчдийн зүгээс олон улсын банк, санхүүгийн байгууллагуудын зээлийн баталгааны хугацааг ирэх есдүгээр сарын 30 хүртэл сунгах хүсэлт гаргахаар болсон талаар “Turquoise Hill Resources” компаниас мэдэгдээд байгаа юм. Үүнтэй уялдаад “Европын сэргээн босголт, хөгжлийн банк” зээлийн баталгааны хугацаагаа есдүгээр сарын 30 хүртэл сунгахыг зөвшөөрчээ. Харин Австралийн экспортын агентлаг ирэх 12 дугаар сарын 31 хүртэл сунгах боломжтой гэж үзсэн байна. Энэ талаар “Зах зээлийн зүгээс Монголын анхны томоохон төсөл болох Оюутолгойтой холбоотой асуудлаар хүлээцтэй хандаж байна” гэж “Deutsche” банкны шинжээч Паул Янг дүгнэжээ. Үүнийгээ тэрбээр Оюутолгойн гүний уурхайн олборлолтыг ойролцоогоор 2018 онд эхлүүлэхээр төлөвлөж байгаатай холбон тайлбарласан байна. Харин “Rio Tinto” компанийн алт, зэсийн ордод хийж байгаа хөрөнгө оруулалт нь төмрийн хүдрийн салбараас хэт хамааралтай байдлыг нь арилгахад тустай гэж шинжээчид дүгнэжээ. Өнгөрсөн онд тус компани Австрали дахь төмрийн хүдрийн уурхайнуудаа өртгөх шийдвэр гарсан юм. Үүний үр дүнд энэ оны нэгдүгээр улиралд төмрийн хүдрийн гарц нь 2013 оны мөн үеэс найман хувиар, тээвэрлэлт нь 16 хувиар өсчээ. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com