Хөлбөмбөгийн Дэлхийн аварга шалгаруулах 21 дэх удаагийн тэмцээн нээлтээ хийлээ. Москва хотын "Лужники" цэнгэлдэх хүрээлэнд болсон нээлтийн ёслолд Их Британийн алдарт дуучин Робби Уильямс өөрийн хит дуунуудаа дуулснаас гадна, Оросын дуурийн дуучин Аида Гарифуллина болон Бразилын домогт тоглогч Рональдо нар нээлтийн ёслолд оролцлоо.

Мөн ОХУ-ын Ерөнхийлөгч Владимир Путин, Олон улсын хөлбөмбөгийн холбооны Ерөнхийлөгч Жианни Инфантино нар 21 дэх удаагийн ДАШТ-ийг нээж, үг хэлсэн юм. Нээлтийн тоглолтод талбайн эзэн ОХУ-ын шигшээ баг Саудын Арабын шигшээ багтай тоглож, өрсөлдөгчөө 5:0-ийн харьцаатайгаар ялалт байгууллаа.

Шинжээчдийн онцолж байгаагаар 2018 оны хөлбөмбөгийн Дэлхийн аварга шалгаруулах тэмцээнийг зохион байгуулж буй ОХУ-ын шигшээд цом өргөх хоёрхон хувийн магадлал байгаа аж. Хэдий тийм боловч нэр хүндээрээ Олимпын наадмын дараа бичигддэг хөлбөмбөгийн Дэлхийн аварга шалгаруулах тэмцээнийг улсдаа зохиож байгаа нь эдийн засгийн хэд хэдэн чухал ач холбогдолтой юм.

ОУХ цэнгэлдэх хүрээлэн болон дэд бүтцийн барилга байгууламжуудад 11 тэрбум ам.доллар зарцуулаад байгаа аж. Гэхдээ жуулчдын зарцуулалт, шигшээ баг нь тэмцээнд хэр амжилттай оролцохоос хамаарч нэмэлт орлого олох боломжтойг ажиглагчид онцолж байна.

Дэлхийн аварга шалгаруулах тэмцээний эдийн засгийн нөлөөлөл нь тоглолтуудыг хүлээн авах 11 хотод төвлөрөх боловч ОХУ-ын дотоодын нийт бүтээгдэхүүний жилийн өсөлтөд ердөө 0.1 хувийн дэмжлэг болно гэж “Bloomberg Intelligence”-ийн шинжээчид тооцоолжээ. “Mckinsey” судалгааны байгууллагын мэдээлснээр энэ удаагийн Дэлхийн аварга шалгаруулах тэмцээн ОХУ-ын эдийн засагт 15 тэрбум ам.доллар оруулж магадгүй байна.

ОХУ-д анх удаа зохион байгуулагдаж буй Дэлхийн аварга шалгаруулах тэмцээн тус улсын 11 хотын 12 цэнгэлдэх хүрээлэнд болно.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com