ОХУ-ын инфляци өнгөрсөн 12 дугаар сард сүүлийн таван жилийн хамгийн дээд түвшиндээ хүрснийг тус улсын Статистикийн Хороо мэдээллээ. Тус улсын инфляци 11.4 хувь болж сарын дүнгээрээ 2.3 хувиар өссөн үзүүлэлттэй гарсан байна. Барууны хоригтой холбоотойгоор ОХУ-ын импортын бараа, бүтээгдэхүүний үнэ өссөнөөс гадна газрын тос болон рублийн ханш унасаар байгаа нь ийнхүү тус улсын инфляци огцом өсөхөд нөлөөлсөн гэдгийг шинжээчид онцолж байгаа юм. Тодруулбал 2014 онд рублийн ханш ам.долларын эсрэг 41 хувиар унасан бол газрын тосны үнэ таван жил хагасын хамгийн доод цэгтээ хүрээд байна. Үүний зэрэгцээ “Morgan Stanley" банк ОХУ-ын инфляцийн 2015 оны таамгаа 13.7 хувь болгон 4.7 нэгжээр өсгөжээ. Үүнд инфляцийн тааруу үзүүлэлтээс гадна газрын тосны үнийн уналт голчлон нөлөөлсөн болохыг тус банк онцоллоо. Газрын тос нь ОХУ-ын нийт экспортын орлогын гуравны хоёр болон төсвийн тал орчим хувийг нь бүрдүүлдэг учраас инфляцийн өсөлтөд хамгийн их нөлөөтэй гэж тус банк үзжээ. Ийнхүү инфляци өсч байгаатай холбоотойгоор хэрэглэгчдийнх нь эрэлт ч буурна гэж шинжээчид таамаглаж байв. Харин тус улсын хамгийн томд тооцогдох жижиглэн худалдаа эрхлэгч “Magnit"-ийн борлуулалт 12 дугаар сард 87.4 тэрбум рубль буюу сүүлийн гурван жилийн дээд хэмжээндээ хүрчээ. Ажиглагчдын зүгээс үүнийг инфляцийн дарамтад орсон иргэд хямдралтай дэлгүүрүүдийг зорих болсонтой холбон тайлбарлаж байна.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com