Шүлхий тархсан гурван аймгийн малыг вакцинжуулах нөөцгүй болсны улмаас ОХУ-аас нэг сая тун вакцин авахаар болсон гэж Онцгой байдлын ерөнхий газраас мэдээллээ. Тодруулбал энэ сарын 21-нд тус нэг сая тун вакцин Монгол Улсад буух юм байна. Энэ талаар Онцгой байдлын ерөнхий газрын дарга Т.Дуламдорж “ОХУ-аас ирэх вакцин бол усан вакцин. 14 хоногийн хугацаанд хоёр удаагийн давтамжтай хийсний дараа мэргэжлийн байгууллагууд үзлэг тандалт хийж, малд дархлаа суусан эсэхийг шинжилнэ” гэж ярьсан. Үүнээс гадна шүлхий өвчин гарсан Сүхбаатар, Хэнтий, Дорноговь аймгийн 11 сумын халдварын голомтод энэ сарын 19-ний байдлаар нийт 1880 гаруй толгой мал өвчилснөөс 1816-г нь устгалд оруулжээ. Түүнчлэн нэг сая 84 мянган малд үзлэг тандалт хийж, нэг саяыг нь вакцинжуулсан гэж холбогдох газраас мэдээлсэн. Харин шүлхийн тархалтыг зогсоох үйл ажиллагааны хүрээнд нийт 264 цэгт 1250 орчим хүн ажиллаж байгаа юм байна. Мөн Хэнтийн аймгийн Онцгой байдлын газрын дарга Д.Батжаргалын мэдээлснээр аймгийн Засаг даргын гамшгаас хамгаалах нөөц хөрөнгөөс одоогоор 83.6 сая төгрөгийг шүлхий өвчинтэй тэмцэх болон урьдчилан сэргийлэх үйл ажиллаганд зарцуулаад байгаа ажээ.

Б.Цацралт

Холбоо барих: Tsatsralt.b@bloombergtvmongolia.com