Индонезийн Жакарта болон Палембанг хотод болж буй Азийн спортын XVIII их наадмын буудлагын төрлийн эмэгтэй 50 метрийн урт бууны гурван байрлалаас буудах төрөлд өрсөлдсөн Олон улсын хэмжээний мастер Г.Нандинзаяа алтан медаль хүртэж, Олон улсын хэмжээний мастер Ч.Нарантуяа мөнгөн медалийн эзэн боллоо.

Олон улсын хэмжээний мастер Г.Нандинзаяа 1175 оноогоор Азийн наадмын дээд амжилт тогтоосон байна. Үүнээс өмнө Г.Нандинзаяа 10 метрийн хийн урт бууны эмэгтэйчүүдийн төрөлд өрсөлдөж, хүрэл медаль хүртээд байсан юм. Ийнхүү Азийн спортын XVIII их наадамд Монгол Улсын баг тамирчид чөлөөт бөхийн төрөлд хоёр алт, нэг мөнгө, гурван хүрэл медаль, буудлагын төрөлд нэг алт, нэг мөнгө, нэг хүрэл медаль хүртлээ.

Өнөөдрийн байдлаар Монгол Улсын баг тамирчид гурван алт, хоёр мөнгө, дөрвөн хүрэл, нийт есөн медаль хүртсэн амжилттайгаар медалийн чанараар 11 дүгээр байрт бичигдэж байна.

Азийн спортын XVIII их наадамд БНХАУ-ын баг тамирчид 38 алт, 30 мөнгө, 15 хүрэл нийт 83 медаль хүртсэн амжилтаар тэргүүлж байгаа бол 20 алт, 23 мөнгө, 15 хүрэл нийт 68 медаль хүртсэн Япон улсын баг тамирчид удаалж байна.

Холбоо барих: minjma.g@bloombergtvmongolia.com