Сууц өмчлөгчид болон Сууц Өмчлөгчдийн Холбооны хууль эрх зүйн орчин, хоорондын уялдаа холбоог сайжруулах асуудлаар Төрийн болон мэргэжлийн байгууллагууд, сууц өмчлөгчдийн төлөөлөгчид хамтран хэлэлцүүлэг зохион байгууллаа. Хэлэлцүүлэгт оролцогчид 2003 онд батлагдсан, одоогийн хүчин төгөлдөр мөрдөгдөж байгаа ”Сууц Өмчлөгчдийн Холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хууль”-ийг шинэчлэх шаардлагатай байгааг онцоллоо. Шударга Өрсөлдөөн, Хэрэглэгчийн төлөө газарт өдөрт ирдэг санал гомдлын 30 орчим хувь нь сууц өмчлөгчдийн холбоодын үйл ажиллагаатай холбоотой байдаг байна. Эдгээр гомдлуудтай холбоотойгоор Өргөдлийн байнгын хорооноос яам болон харьяа байгууллагуудад хууль эрх зүйн орчныг бүрдүүлэх, сайжруулах чиглэл өгөөд байгаа талаар Барилга Хот, Байгуулалтын яамнаас мэдээллээ. 2016 оны байдлаар Монгол Улсын нийт өрхийн 30 хувь нь буюу 232.3 мянган өрх инженерийн бүрэн хангамжтай орон сууцанд амьдарч байгаа бөгөөд эдгээрийг хариуцан 1022 Сууц Өмчлөгчдийн Холбоо үйл ажиллагаа явуулж байгаа аж. Өнгөрсөн хоёрдугаар сард Барилга Хот, Байгуулалтын яам, Нийслэлийн Засаг Даргын Тамгын Газар, Шударга Өрсөлдөөн, Хэрэглэгчийн Төлөө газар хамтран Сууц Өмчлөгчдийн Холбоодод хяналт шалгалт хийсэн байна. Шалгалтын дүн хангалтгүй гэж гарсан нь мөн л хууль эрх зүйн орчинтой холбоотой гэдгийг Шударга Өрсөлдөөн, Хэрэглэгчийн Төлөө газраас онцолж байна.

Т.Дэмбэрэлням

Холбоо барих: demberelnyam.t@bloombergtvmongolia.com

minjma.g@bloombergtvmongolia.com