УИХ-ын чуулганаар Онцгой албан татварын тухай хуульд өөрчлөлт оруулах тухай хуулийн төслийг хэлэлцэхээр болоод байна. Одоо үйлчилж буй хуулийн дагуу согтууруулах ундаа, тамхи, автобензин, дизель түлш, суудлын автомашин зэрэг бүтээгдэхүүний биет нэгж тус бүрт 0.2-оос 80 мянган ам.доллар хүртэл онцгой албан татвар ногдуулж байгаа аж. Хуулийн төслийн үзэл баримтлалд ийнхүү онцгой албан татварыг ам.доллараар тооцон авах нь "Төлбөр тооцоог үндэсний мөнгөн тэмдэгтээр гүйцэтгэх тухай" хуультай зөрчилдөж байна гэж үзсэн байна. Хууль батлагдвал аж ахуй нэгжийн татварын хэмжээ болоод төсөвт төвлөрөх онцгой албан татварын хэмжээ ам.долларын ханшийн өсөлтөөс хамааралгүй болох юм. Түүнчлэн хуулийн төсөл батлагдсанаар валютын зохиомол эрэлтийг бий болгохоос сэргийлж, төгрөгийн ханшийг тогтвортой байлгахад эерэг нөлөө үзүүлнэ гэж төсөл санаачлагчид үзэж байна. 2014 оны нэгдсэн төсвийн урьдчилсан гүйцэтгэлээр Онцгой албан татвараас төсөвт 454.3 тэрбум төгрөг төвлөрсөн байна. Өөрөөр хэлбэл нийт татварын орлогын 8.7 хувийг бүрдүүлжээ. Чуулганы нэгдсэн хуралдааны үеэр УИХ-ын гишүүн С.Дэмбэрэл, Ч.Улаан нар “Хуулийн зөрчлийг арилгах талаас дээрх хуульд өөрчлөлт оруулах нь зөв. Аж ахуйн нэгжүүдэд ирэх ачааллыг ч нөгөө талдаа бууруулна" гэсэн байр суурь илэрхийлж байв. Дотоодод үйлдвэрлэсэн бараанд онцгой албан татвар ногдуулахдаа үйлдвэрлэгчийн борлуулсан барааны биет нэгжийг үндэслэн тогтоодог тул ам.долларын ханш өсөхийн хэрээр компанийн ашигт ажиллагаа буурахад хүргэж байгааг шинжээчид онцолж байна.

О.Одгэрэл

Холбоо барих: odgerel.o@bloombergtvmongolia.com

minjma.g@bloombergtvmongolia.com