Хүнсний гол нэрийн бараа, бүтээгдэхүүний үнийн өсөлтийг тогтворжуулах, махны үнэ, нөөцийг тогтвортой байлгах зорилгоор “Махны нөөц бүрдүүлэх, үнийг тогтворжуулах” дэд хөтөлбөр хэрэгжүүлж байна. Дэд хөтөлбөрийн хүрээнд нөөцийн махыг энэ оны 12 дугаар сарын 25-наас эхлэн худалдаанд гаргахаар болжээ. Энэ жил махны нөөц бүрдүүлж, худалдан борлуулахаар нийслэлд нэг, Дархан, Эрдэнэт хотод хоёр компани шалгарч, нийт 11 мянга 446.1 тонн мах нөөцлөөд байна. Махны нөөцийг бүрдүүлэхдээ 50 гаруй хувийг нь хонины мах, 35 хувийг нь ямааны мах, харин 15 хувийг нь үхрийн мах байхаар тооцоолжээ. Нөөц бэлтгэхэд зориулж 87 тэрбум төгрөгийн хөнгөлөлттэй зээлийг Засгийн газраас мах бэлтгэх компаниудад олгоод байна. ҮХААЯ болон Монголбанкны мэдээлж байгаагаар 2013 онд “Махны нөөц бүрдүүлэх, үнийг тогтворжуулах” дэд хөтөлбөрийг хэрэгжүүлсний дүнд махны үнэ тогтворжиж, инфляцийн түвшинд эзлэх махны хувийн жин өнгөрсөн онтой харьцуулахад 10.4 хувиар буурсан байна. Ирэх 2014 онд Улаанбаатар, Дархан, Эрдэнэт хот дахь нөөцийн махны менежерийг энэ оны есдүгээр сард сонгон шалгаруулж, гэрээ байгуулаад байгаа аж. Энэхүү дэд хөтөлбөрийн хүрээнд ирэх онд нийт 14 мянган тонн махны нөөц бүрдүүлж, худалдан борлуулахаар болжээ. Үүнд Дархан, Эрдэнэт хотод тус бүр нэг мянган тонн мах, харин нийслэлд “ANDM” болон “Баатрууд Тэнгэр” компани тус бүр зургаан мянган тонн махны нөөц бүрдүүлэн, ангилан савлаж, худалдаалах юм. Салбарын яамны онцолж байгаагаар хэрэглэгчдээс урьд өмнө нөөцийн махны чанарын талаар шүүмжлэл их гардаг байсныг халах үүднээс энэ жил цул болон  нэгдүгээр зэрэглэлийн махыг 1.5 кг-аар савлан худалдаанд гаргахаар болжээ. Үндэсний Статистикийн Хорооны мэдээлснээр 2013 оны 11 дүгээр сарын 20-ны байдлаар нэг кг хонины цул мах 6950 төгрөг, үхрийн цул мах 9020 төгрөг, ямааны мах 5100 төгрөг, адууны мах 5800 төгрөгийн үнэтэй байна. 

М.Дэлгэрмаа

Холбоо барих: delgermaa.m@bloombergtvmongolia.com 

minjma.g@bloombergtvmongolia.com