Адуунчулууны хүрэн нүүрснээс метанолоор дамжуулан шатахуун гаргах үйлдвэрийг 2018 онд ашиглалтад оруулахаар төлөвлөж буй. Энэхүү үйлдвэр ашиглалтад орсноор жилд 400 мянган тонн шатахуун үйлдвэрлэж, дотоодын шатахууны хэрэгцээний 30-40 хувийг хангах боломж бий болох талаар албаныхан онцолсон. Өөрөөр хэлбэл Монгол Улс эрчим хүчний арвин нөөцөө ашиглан хямд өртгөөр шингэрүүлсэн түлш боловсруулна. Түүнчлэн тус үйлдвэр ашиглалтад орсноор нийт 400 хүний ажлын байр шинээр бий болохоос гадна улсын төсөвт 3.3 их наяд төгрөгийг хураамж болон татвар хэлбэрээр оруулах тооцоо гарчээ. Харин үйлдвэрийн хөрөнгө оруулалтад нийт 3.06 их наяд төгрөг шаардлагатай бөгөөд зардлаа эргэн төлөх хугацааг 9.3 жил гэж тооцоолсон байна. Мөн төслийн хүрээнд шингэн түлшний үйлдвэрээс гадна 300 мегаваттын цахилгаан станц баригдана гэж төслийн удирдагч, “Монголын алт” компанийн Технологийн судалгааны төвийн захирал Ж.Золжаргал Блумбергт өгсөн ярицлагадаа онцолсон. Түүнчлэн тэрбээр “Зүүн бүсэд оршдог хүрэн нүүрсний томоохон нөөцийг “Монголын алт” компани нүүрснээс шингэн түлш буюу бензин үйлдвэрлэх зорилгоор судалгаа хийж байна. Төслийн хүрээнд баригдах цахилгаан станц нь нүүрсний үйлдвэрээ эрчим хүчээр хангахаас гадна зүүн бүсийн эрчим хүчний дутагдалтай хэрэглэгчдэд нийлүүлэх зорилготой. Цахилгаан станцыг 2016 онд, нүүрснээс шатахуун гаргах үйлдвэрийг 2018 онд ашиглалтад оруулахаар төлөвлөж байна” гэсэн юм. Үүнээс гадна Адуунчулууны уурхай нь хамгийн бага үнээр буюу нэг тонн нүүрсээ 9600 төгрөгөөр нийлүүлдэг гэж холбогдох газраас мэдээлсэн. Уурхайн дарга Б.Шатарын хэлснээр уурхай, станц хоёрын хооронд ердөө найман км зайтай байдаг нь нүүрсний үнэ хямд байхад ихээхэн нөлөөлдөг юм байна. Мөн тус уурхай жилд 450 гаруй мянган тонн нүүрс олборлодог ба үүнээс 90 гаруй хувийг нь Дорнодын ДЦС-д нийлүүлдэг ажээ.

Холбоо барих: Tsatsralt.b@bloombergtvmongolia.com