2019 он гэхэд дэлхийн нүүрсний хэрэглээ есөн тэрбум тонныг давах төлөвтэй байгааг Олон улсын эрчим хүчний агентлаг мэдээллээ. Тайланд дурдсанаар дунд хугацаан дахь нүүрсний хэрэглээ жилд дунджаар 2.1 хувиар өсөхөөр байгаа нь 2013 оны таамаг болох 2.3 хувиас буурсан үзүүлэлт болж байгаа юм. Одоогоор дэлхийн нүүрсний 60 орчим хувийг БНХАУ хэрэглэж байгаа бол АНУ болон Европын улс орнуудад нүүрсний үр ашиггүй хэрэглээнээс татгалзах бодлого хэрэгжүүлж байгаа аж. Тиймээс ирэх 2019 он хүртэлх таван жилийн хугацаанд БНХАУ-ын нүүрсний салбарын бодлого, эрчим хүчний эх үүсвэрийг төрөлжүүлэх кампанит ажил хэрэглээг тодорхойлсон хэвээр байх төлөвтэй байна. Үүнээс гадна Эдийн засгийн хамтын ажиллагаа хөгжлийн байгууллагын гишүүн орнууд дахь нүүрсний хэрэглээ буурах төлөвтэй байгаа аж. Тухайлбал АНУ-д л гэхэд 2019 он хүртэл нүүрсний хэрэглээ занарын хийгээс хамаарч 1.7 хувиар буурахаар байна. Эрчим хүчний нүүрсний үнийн өрсөлдөөн зах зээлд оролцогчдын хувьд анхаарал татсан хэвээр байгаа бөгөөд нүүрсний үнийн уналт 2014 онд эрчимжсэн нь олборлогчид зардлаа танаж, илүү оновчтой зохицуулалт хийх, төсвийн сахилга бат сахихад хүргэснийг тайланд онцолжээ. Олон улсын эрчим хүчний агентлагийн тэргүүн Мариа Ван Дэр Хоэвэн “Энэ онд хөгжиж байгаа улс орнуудын өндөр үр ашигтай нүүрсний цахилгаан станцуудад хөрөнгө оруулахыг" уриалсан байна. Өмнөд Африкаас Зүүн Өмнөд Ази хүртэлх бүс нутагт шинээр олон цахилгаан станц баригдаж байгаа ч дийлэнх нь хуучин технологи ашиглаж байгаа нь анхаарал татсан асуудал болохыг тэрбээр онцолжээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com