Өнгөрсөн долоо хоногт нийслэлийн хэмжээнд 75 мянга 497 амбулаторийн үзлэг хийгдсэнээс 4.3 хувийг томуу, томуу төст өвчин эзэлж байгааг Нийслэлийн эрүүл мэндийн газраас мэдээллээ.

Үүнийг өмнөх оны мөн үетэй харьцуулахад 1.2 хувиар өссөн үзүүлэлт болжээ. Өвдсөн хүмүүсийн 70 орчим хувь нь 0-4 насны хүүхдүүд байна. Өнөөдрийн байдлаар 1814 хүн эмнэлэгт эмчлүүлж байгаагийн 37.6 хувь нь хүүхдүүд байгаа аж. Тэдний 50 орчим хувь нь амьсгалын замын өвчний улмаас эмнэлэгт хэвтэн эмчлүүлж байна. Одоогоор нийслэлд хүүхдийн 1123 ор байгаа бөгөөд ачаалал ихэссэн тохиолдолд 600 ор нэмж дэлгэхээр бэлтгэсэн талаар Нийслэлийн эрүүл мэндийн газраас мэдээлэв.

Үүнээс гадна дархлаажуулалтын 10 хоногийн эхний хоёр хоногт цэцэрлэгийн насны 33 мянга 600 хүүхдэд вакцин хийгээд байна. Харин энэ долоо хоногоос эхлэн сургуулийн насны хүүхдүүдийг дархлаажуулах ажээ. Эрүүл мэндийн яамнаас мэдээлснээр улсын хэмжээнд 509 мянга 500 хүн тун вакциныг хүлээн аваад байгаа юм.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com