Өндөржүүлсэн бэлэн байдлыг вакцин гарах хүртэл үргэлжлүүлнэ гэж Монгол Улсын Ерөнхий сайд мэдэгдсэнээс хойш нислэгийн тийз захиалагч компаниуд бүсээ чангалах шаардлагатай болсон гэдгийг онцоллоо.

Тухайлбал: “Air Market” компани наймдугаар сараас нөхцөл байдал сайжирна гэж таамаглаж байсан ч үүнийгээ өөрчилж, IX, X сараас нислэгүүд нээгдэнэ гэсэн тооцоотой ажиллаж байна. 125 ажилтантай тус компани ажилтнуудынхаа 80 хувийг амрааж, цалингийн доод түвшнээр цалинжуулж байгаа ажээ. Түүнчлэн үйл ажиллагаа нь доголдсон компанийн ажилтнуудад олгох 200 мянган төгрөгийн урамшуулалд хамрагдахаар Сангийн яаманд хүсэлтээ хүргүүлсэн байна. Урамшууллын хэрэгжих хугацаа дуусахад 20 хоног дутуу байгаа ч одоог хүртэл шийдвэрлэгдээгүй байгаа юм. Иймд цаашид ажилтнуудаа цомхотгож магадгүй байгаагаас гадна ажилтнууд ажлаасаа гарч магадгүй байгааг мэдээлсэн юм.

Нөгөөтэйгөөр долоодугаар сараас нөхцөл байдал сайжирна гэх хүлээлттэй байсан “Airlink Mongolia” компани сул зогсолт зарласан байна. Тус компани нийт ажилтнуудынхаа 30 орчим хувийг шат дараатай цомхотгож, дийлэнх ажилтнууддаа цалинтай чөлөө олгож байгаа юм байна. Энэ байдлаараа энэ оныг дуустал тэсэх чадвартай гэж тус компанийн Гүйцэтгэх захирал онцоллоо.

Харин “Air Trans” компани ажлын байраа хадгалахад анхаарч, бүх ажилчдаа гэрээр нь ажиллуулж байгаа юм байна. Цар тахал гарснаас хойш нислэгийн тийз захиалга 95 хувиар буурсан, үлдсэн таван хувь нь орон нутгийн нислэг гэж тус компанийн Гүйцэтгэх захирал мэдээллээ. Мөн Улаанбаатар дахь 10 оффисынхоо есийг нь хаасан байна. Түүнчлэн Дархан, Эрдэнэт дахь салбаруудаа мөн хаахад хүрчээ. “Air Trans” компани цаашид гурван сар тэсэх боломжтой гэдгээ мэдээлсэн юм. Хилийн хязгаарлалт сунгагдсаар байвал ажилтнууддаа цалингүй чөлөө олгохоос өөр аргагүй гэдгээ дурдлаа.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com