Энэ оны дөрөвдүгээр сараас эхлэн Улаанбаатар хотын амьжиргааны доод түвшинг 169 мянган төгрөг болгон нэмэгдүүлээд байна. 1991 оноос хойш Монгол Улс хүн амын амьжиргааны доод түвшинг 23 удаа шинэчлэн тогтоосон байдаг. Монгол Улсын нийт хүн амын бараг тал хувь нь оршин суудаг Улаанбаатар хотын нэг хүнд ногдох сарын дундаж бодит мөнгөн орлогын хэмжээ амьжиргааны доод түвшнээс 88 хувиар их байгаа юм. Статистик мэдээллээс харахад Улаанбаатар хотын гурван иргэн тутмын нэг нь амьжиргааны доод түвшнээс доогуур хэрэглээтэй байгаа аж. Харин өрхийн орлогын өсөлт 1992 онд 5158 төгрөг байсан Улаанбаатар хотын нэг өрхийн сарын дундаж мөнгөн орлого 1998 онд 74 мянга 500 төгрөг, 2013 онд нэг сая 57 мянга 430 төгрөг болж нэмэгдсэн болохыг Нийслэлийн Статистикийн газраас мэдээллээ. Өөрөөр хэлбэл 1992 оноос хойших сүүлийн 22 жилийн хугацаанд нийслэлчүүдийн өрхийн орлого 205 дахин нэмэгджээ. Засгийн газрын 20 дугаар тогтоол гарснаас хойш нэг жилийн дараа буюу 1992 онд нийслэлийн иргэдийн дундаж цалин 3078 төгрөг байсан бол 1998 онд нийслэлийн хэмжээнд дундаж цалин 35 мянга 300 төгрөг болж, зургаан жилийн дотор 11 дахин нэмэгдсэн байна. Нийслэлийн Статистикийн газрын мэдээлснээр цалингийн дундаж хэмжээ 2010 онд 325.9 мянган төгрөг байсан нь 2013 онд хоёр дахин нэмэгдэж, 630.7 мянга болжээ. Хэдий тийм боловч орлого нэмэгдэхийн хэрээр хэрэглээ дагаж нэмэгдсэн дүр зураг хадгалагдсан хэвээр байна. Нийслэлийн нэг өрхийн сарын орлогын 30 орчим хувь, дундаж цалингийн 50 хувийг хүнсний бүтээгдэхүүнд зарцуулдаг талаар статистик мэдээлэлд дурджээ.

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com