2014 оны нийслэлийн төсвийн орлогын хүлээгдэж байгаа гүйцэтгэлийг 2.9 тэрбумаар бууруулж, 556.7 тэрбум төгрөг байхаар төсөвт тодотгол хийжээ. Энэхүү асуудлыг Нийслэлийн иргэдийн төлөөлөгчдийн ээлжит хуралдаанаар хэлэлцээд, 2014 оны төсөвт хэд хэдэн өөрчлөлтийг оруулсан байна. Тухайлбал 2013 оны орлогын давалт болох 19.2 тэрбум төгрөгийг нийслэлийн 2014 оны төсөвт нэмж зарцуулахаар боллоо. Нийслэлийн төсвөөс орон нутгийн хөгжлийн нэгдсэн санд төвлөрүүлэх хөрөнгийн хэмжээг 44 тэрбум 384 сая 898.6 мянган төгрөгөөр, Нийслэлийн 2013 оны орлогын давалт гурван тэрбум 94 сая 280.1 мянга, 2013 оны хөрөнгө оруулалтын ажлын зарцуулагдаагүй үлдэгдэл 14 тэрбум 471.5 сая, нийслэлийн төсөвт байгууллагуудын өнгөрсөн оны хэмнэлт, үйл ажиллагааны орлогын давалт нэг тэрбум 689 сая 417.2 мянга нийт 19 тэрбум 255 сая 197.3 мянган төгрөгийг нийслэлийн 2014 оны төсөвт нэмж зарцуулахаар болжээ. Мөн нийслэлийн нийтийн тээврийг хөгжүүлэх, парк шинэчлэх сангийн хөрөнгөөс 20 тэрбум төгрөг, Улаанбаатар - Орон сууц сангийн хөрөнгөөс таван тэрбум төгрөг, орон сууц хөгжүүлэх сангийн хөрөнгөөс 1.2 тэрбум төгрөгийг зарцуулахаар болов. Түүнчлэн 2014 онд нийт 210.9 тэрбум төгрөгийн 98 төсөл, арга хэмжээг хэрэгжүүлэхээр байсныг өөрчилж, 112 төсөл, арга хэмжээг 208.6 тэрбум төгрөгөөр санхүүжүүлэхээр тусгасан байна. Монгол Улсын Засгийн газраас төсвийг хэмнэлтийн горимд шилжүүлсэнтэй холбоотойгоор нийслэл, дүүргийн төсвийн захирагч нар урсгал зардлаа 20 хувиар бууруулах бодлого баримтлан ажиллаж байгаа аж. 2013 оны хувьд нийслэлийн төсвийн орлогын төлөвлөгөө 2.2 хувиар давж, 727.7 тэрбум төгрөгийн орлого төвлөрсөн байна. Харин зардлын нийт төлөвлөгөөг 851.4 тэрбум төгрөгөөр баталснаас 169.8 тэрбум төгрөгийг нь дутуу зарцуулсан болохыг Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

  Э.Нарантунгалаг 

Холбоо барих: narantungalag.e@bloombergtvmongolia.com 

minjma.g@bloombergtvmongolia.com