Нийгмийн даатгалын санд 7 дугаар сарын эцсийн байдлаар нийт 629.2 тэрбум төгрөгийн шимтгэлийн орлого төвлөрүүлж, орлогын төлөвлөгөөг 94.8 хувиар биелүүлсэн байна. Орлого төвлөрүүлэлтийн хувьд энэ жил өмнөх оны мөн үетэй харьцуулахад 34.7 тэрбум төгрөгөөр өсчээ.

629.2 тэрбум төгрөгийн шимтгэлийн орлогын дийлэнхийг буюу 63.6 хувь болох 399.9 тэрбум төгрөгийг тэтгэвэрийн даатгалын санд хуваарилсан талаар Нийгмийн даатгалын ерөнхий газар мэдээллээ.

Харин зарцуулалт талаас задлаад харвал, давхардсан тоогоор 2 сая 575.8 мянган иргэний тэтгэвэр, тэтгэмж, төлбөр, эрүүл мэндийн тусламж үйлчилгээний зардалд нийт 858.5 тэрбум төгрөг зарцуулжээ. Энэ нь өмнөх оны мөн үетэй харьцуулахад сангийн зардал 134.7 тэрбум төгрөгөөр өссөн дүн байна. Ийнхүү орлогын өсөлт зардлын өсөлтөөс бараг 4 дахин бага үзүүлэлттэй байгаа юм.

Хамгийн их хуваарилалт хийгддэг тэтгэврийн халамжийн зарцуулалтыг харвал 7-р сарын байдлаар өндөр насны, тахир дутуугийн, тэжээгчээ алдсаны, цэргийн тэтгэвэр авагч 350.3 мянган иргэний тэтгэврийг олгосон байна. Үүнээс 73.9 хувь буюу 497.3 тэрбум төгрөгийг өндөр насны тэтгэвэр авагч 248.7 мянган иргэнд зарцуулжээ.

Нийгмийн даатгалын сан нь мөн их хэмжээний авлагатай байгаа. 7 дугаар сарын байдлаар нийгмийн даатгалын шимтгэлийн авлага 69.2 тэрбум төгрөг байна. Нийт шимтгэлийн авлагын 93.2 хувь буюу 64.5 тэрбум төгрөгийг аж ахуйн нэгж байгууллагуудын авлага эзэлж байна. Мөн авлагын 45.4 хувийг 121 ба түүнээс хоногтой хуримтлагдсан авлагын дүн эзэлж байгаа юм.

М.Дэлгэрмаа

Холбоо барих: Delgermaa.M@bloombergtvmongolia.com

Anu.G@bloombergtvmongolia.com