МХБ-ийн I ангилалд бүртгэлтэй хүнсний салбарт үйл ажиллагаа явуулдаг хувьцаат компаниудын хагас жилийн хувьцааны ханшийн хөдөлгөөнийг тоймлоё. “АПУ” ХК-ийн нэгж хувьцааны ханш VI сарын 30-ны арилжааны хаалтын дүнгээр оны эхнээс хойш 13.5 хувиар буурсан бол жилийн дүнгээр 5.8 хувь буурч 549 төгрөг болсон байна. Ингэснээр тус компанийн хувьцааны ханшаар илэрхийлсэн зах зээлийн үнэлгээ 584.2 тэрбум гаруй төгрөг болсон. МХБ-ийн I улирлын тайлангаар тус компани хамгийн өндөр зах зээлийн үнэлгээтэй 30 компанийг тэргүүлсэн. Мөн тайлант хугацаанд 1.3 сая ширхэг хувьцаа нь арилжигдаж идэвхтэй арилжигдсан үнэт цаасны эрэмбээр найм дугаарт бичигдсэн. 2019 онд улсад 303 тэрбумын татварыг төвлөрүүлснээр ТОП-100 ААН-ийн 13-рт бичигдсэн “АПУ” ХК 2020 онд экспортын тоо хэмжээг нэмэгдүүлэх, голлох зах зээлүүд дээр байр сууриа баталгаажуулж, ахиулан ажиллах зорилттой байгаагаа мэдээлсэн.

Мөн ангиллын “Сүү” ХК-ийн нэгж хувьцааны ханш VI сарын 30-ны арилжааны хаалтын дүнгээр оны эхнээс хойш 10.7 хувиар буурсан бол жилийн дүнгээр 1.03 хувь буурч 186.87 төгрөг болсон байна.

Тус компанийн хувьцааны ханшаар илэрхийлсэн зах зээлийн үнэлгээ 64.2 тэрбум төгрөг болсон байна. Компани 2019 онд нийт сүү, сүүн бүтээгдэхүүний зах зээлийн 49 хувийг, шингэн сүүний зах зээлийн 73 хувийг эзэлж байна.

“Махимпекс” ХК-ийн нэгж хувьцааны ханш VI сарын 30-ны арилжааны хаалтын дүнгээр оны эхнээс хойш болон жилийн дүнгээр 1.9 хувь буурч 2549 төгрөг болсон байна хувьцааны ханшаар илэрхийлсэн зах зээлийн үнэлгээ нь 9.7 орчим тэрбум төгрөг байна. Өнгөрсөн оны цэвэр ашиг нь 2018 онтой харьцуулахад зургаан хувиар өсөж 819.3 сая төгрөг болсон “Махимпекс” компани хувьцаа эзэмшигчдэдээ X сарын 1-нд багтаж 456 сая төгрөгийг ногдол ашиг хуваарилахаар шийдвэрлээд байгаа.

“Талх чихэр” ХК-ийн нэгж хувьцааны ханш VI сарын 30-ны арилжааны хаалтын дүнгээр оны эхнээс хойш 17.8 хувиар буурсан бол жилийн дүнгээр 24.9 хувь буурч 12,480 төгрөг болсон байна. Ингэснээр компанийн хувьцааны ханшаар илэрхийлсэн зах зээлийн үнэлгээ 12.7 тэрбум төгрөгөөр хэмжигдэж байна. Тус компани 2019 оны дүнгээр дотоодын талх, талхан төрлийн бүтээгдэхүүний зах зээлийн 70 хувийг бүрдүүлснээ мэдээлж байсан.

Б.Энхжин

Холбоо барих: enkhjin.b@bloombergtvmongolia.com

uyanga.m@bloombergtvmongolia.com