Монголбанк, Зам тээврийн яамнаас хамтран хэрэгжүүлж буй Өргөн хэрэглээний импортын бараа бүтээгдэхүүний өртгийг бууруулах дэд хөтөлбөрийн хүрээнд дэвшүүлсэн 12 зорилтын хэрэгжилт 50 орчим хувийн биелэлттэй байгаа дүн гарчээ.

Дэд хөтөлбөр батлагдсанаас хойшхи гурван сарын хугацаанд буюу 1 дүгээр сарын 31-ны байдлаар нийт 189 галт тэрэг, 10554 вагоноор нийт 611.4 мянган тонн ачаа тээвэрлэсэн байна. Мөн авто зам, төмөр замаар орж ирсэн ачааны зохион байгуулалтыг сайжруулах, хэрэглэгчдэд зөвлөгөө өгөх, Улаанбаатарт ирсэн ачааны мэдээллийг мессежээр илгээх зэрэг хаалганаас хаалганд үйлчилгээг нэвтрүүлжээ. Үүнээс гадна төмөр замын хэрэгцээнд шаардлагатай шатахууны импортод зориулж Монголбанкнаас олгох 22 тэрбум төгрөгийн зээлэх асуудлыг Улаанбаатар төмөр замын нийгэмлэгийн хурлаар шийдсэн байна. Энэ дагуу Роснефть компаниас шатахуун импортлох асуудлаар хэлэлцээр хийж эхэлжээ. Харин Тяньжин-Замын-Үүд чиглэлийн тээврийг хөнгөвчлөх, төмөр замын салбарын хөдлөх бүрэлдэхүүний парк болон ачааны терминалын хүчин чадлыг нэмэгдүүлэх зэрэг ажлууд хэрэгжилтийн шатандаа явж байгаа аж.

Дэд хөтөлбөрт таван бүлэг 12 арга хэмжээ байгаагаас хоёр нь 100 хувь, хоёр нь 70 хувь, үлдсэн нь 50-иас доош хувийн биелэлттэй байна. Ерөнхийдөө улс хооронд хийгдэх хэлэлцээр удаашралтай байгаа аж. Тухайлбал, Монгол-Хятадын Засгийн газар хоорондын комиссын хуралдаанаар Тяньжин-Замын-Үүд чиглэлийн ачаа тээвэрлэлтийг хөнгөвчлөх чиглэлээр Хятадын төмөр замын яаманд асуудал тавьсан ч шийдвэрлэлт удааширсан байна. Харин Улаанбаатар төмөр замын хүчин чадлыг сайжруулахын тулд хувь нийлүүлсэн нийгэмлэгийн ерөнхий хороо 92 тэрбум төгрөгийн зээл авахаар тогтжээ. Тус хөрөнгөөр ачааны 400 вагон, ачааны 60 битүү вагон, гол замын гурван зүтгүүр, сэлгээний гурван зүтгүүр худалдан авах гэнэ. Үүнээс гадна 1000 вагон нэмж худалдан авч, үйлчилгээ үзүүлэх нүүрсний тээврийн аж ахуйн нэгжтэй гэрээ хийх ажлууд дутуу үлдсэн байна.