Монгол Улсын Ерөнхийлөгч Ц.Элбэгдорж БНХАУ-д Төрийн айлчлал хийж, талууд иж бүрэн стратегийн түншлэлийн харилцаагаа гүнзгийрүүлэн хөгжүүлэх тухай хамтарсан мэдэгдэл гаргалаа. Уг мэдэгдэлд хоёр улсын иж бүрэн стратегийн түншлэлийн харилцаанд шинэ боломжууд бүрдэж байгааг дурдаад айлчлалын хүрээнд өргөн хүрээний тохиролцоонд хүрснийг онцолжээ. Тухайлбал Монголын “Талын зам”, БНХАУ-ын Бүс ба Зам хөгжлийн стратегийг уялдуулах нь хамтын ажиллагааны шинэ боломжуудыг бий болгоно гэж үзэж байгаагаа харилцан илэрхийлсэн байна. Үүнээс гадна эрчим хүч, дэд бүтэц тэргүүтэй хэд хэдэн салбарт хамтын ажиллагаагаа өргөжүүлэх чиглэлээр санамж бичиг байгуулав. Энэ удаагийн айлчлал үр дүнтэй болсныг Гадаад хэргийн сайд Л.Пүрэвсүрэн онцолсон юм. Энэ удаагийн айлчлалын хүрээнд Монгол Улсын Засгийн газар, БНХАУ-ын “Экзим” банк хоорондын нэг тэрбум ам.долларын зээлийн ерөнхий хэлэлцээр байгууллаа. Уг зээлийн дийлэнх хэсэг болох 700 гаруй сая ам.доллараар Эгийн голын усан цахилгаан станцын төслийг санхүүжүүлэхээр Засгийн газраас шийдвэрлээд байна. Үүнээс гадна эрчим хүчний салбарт хамтын ажиллагааны санамж бичиг байгуулсан нь Шивээ-Овоогийн хүрэн нүүрсний ордод түшиглэн цахилгаан станц байгуулах төслийн ТЭЗҮ-ийн судалгааны ажлыг хамтран гүйцэтгэхэд чиглэгдэх юм.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com