Монгол Улс дэлхийн улс орнуудтай тогтоосон дипломат харилцааны эхэн үе буюу 1950 оны дөрөвдүгээр сарын 22-нд Болгар улстай дипломат харилцаа тогтоосон байна. Үүнээс хойш хоёр улсын хамтын ажиллагаа олон салбарыг хамарч, багагүй гэрээ хэлэлцээр байгуулжээ. Сүүлийн үед буюу 2013 онд Болгарт хөдөө аж ахуйн чиглэлээр оюутан сургах хөтөлбөр хэрэгжүүлэх асуудал хөндөгдөж байсныг Гадаад хэргийн яамнаас мэдээллээ. Мөн хоёр улсын Засгийн газар хооронд соёл, боловсрол, шинжлэх ухааны салбарт 2012-2016 онд хамтран ажиллах хөтөлбөрт гарын үсэг зурж байсан байна. Хөтөлбөр соёл, урлагийн салбарын хамтын ажиллагааг идэвхжүүлэхэд чиглэсэн байжээ. Өнгөрсөн хугацаанд Монгол Улсын 500 гаруй иргэн Болгар улсад дээд боловсрол эзэмшиж, урт, богино хугацаанд мэргэжил дээшлүүлсэн байна. Хоёр улсын хооронд байгуулсан гэрээ хэлэлцээрийн хувьд хамгийн анх 1957 онд Засгийн газар хооронд соёлын хэлэлцээр байгуулж, урлаг соёл, хэвлэл мэдээлэл, шинжлэх ухааны салбарт хамтран ажиллах асуудлыг багтаасан болохыг Шинжлэх ухааны академийн судалгаанд онцолжээ. Үүний дараа 1960 онд хоёр улсын Засгийн газар хооронд шинжлэх ухаан, техникийн хамтын ажиллагааны хэлэлцээр байгуулсанаас хойш салбаруудыг нэгтэсэн ерөнхий хэлэлцээрүүд байгуулагдаж байжээ. Мөн хоёр улсын телевизийн салбар болон эрүүлийг хамгаалах чиглэлээр хэлэлцээрүүд байгуулагдаж байсныг дурдаж болох юм. 1982 онд хоёр улсын хооронд Монголын талаас 30 хүртэлх хоногийн хугацаанд визгүй зорчих албан хэлэлцээр хэрэгжиж эхэлсэн болохыг Гадаад хэргийн яамнаас мэдээлж байна. Монгол Улсын Засгийн газар эдийн засгийг эрчимжүүлэх ажлын хүрээнд 2015 оныг дуустал Монгол Улсад визгүй зорчих 42 улсын жагсаалтад Болгар улсыг оруулсан байдаг ажээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com