Үндэсний уламжлалт Сар шинийн баярын өмнө урьд жилүүдийн адил шинэ мөнгөн дэвсгэрт хамгийн их эрэлттэй байлаа. Монгол Улсын цаасан мөнгөн дэвсгэртийн дундаж насжилт 2.8 жил байгаа тухай Монголбанк мэдээлж байна. Өөрөөр хэлбэл Монгол Улсын мөнгөн дэвсгэртийн насжилт харьцангуй богино байгаа аж. Хэдийгээр Сар шинийн баярын үеэр шинэ мөнгөн дэвсгэрт жил бүр хамгийн их эрэлттэй байдаг боловч энэхүү хэрэглээнд зориулж шинээр мөнгөн дэвсгэрт хэвлүүлдэггүй юм байна. Мөнгөн дэвсгэрт шинээр хэвлүүлэх эсэх асуудлыг мөнгөний нөөц болон насжилтаас хамаарч шийддэг ажээ. Өнөөдрийн байдлаар Монгол Улсын хэрэглээнд нэг төгрөгөөс 20 000-тын дэвсгэрт хүртэл нийт 11 төрлийн цаасан мөнгөн дэвсгэрт ашиглаж байна. Эдгээр мөнгөн дэвсгэртийн шинэчлэл 1993 оноос эхэлж, 2006 онд хамгийн сүүлд 20 000 төгрөгийн дэвсгэртийг гүйлгээнд гаргажээ. Харин 1995 онд 5000 болон 10 000 төгрөгийн дэвсгэртийг гүйлгээнд гаргасан байдаг байна. Түүнчлэн мөнгөн дэвсгэртийг өндөр нууцлалтайгаар, олон улсын стандартын дагуу хэвлүүлэх зардал нь олон улсын валютын хөдөлгөөнөөс хамаарч харилцан адилгүй байдаг боловч хэвлэх зардал нь өндөр байдаг гэж Монголбанкны мөнгөн тэмдэгт, үнэт зүйлсийн газрын захирал П.Сүхбаатар онцоллоо. Энэ жил Сар шинийн баярыг тохиолдуулан арилжааны банкууд иргэдийн хуучин мөнгийг шинэ дэвсгэртээр сольж өгөхөөр 14 хоногийн өмнөөс нөөцөө бүрдүүлж, Монголбанкинд ханджээ. Мөн иргэд ямар ч шимтгэл хураамжгүйгээр хуучин дэвсгэртээ банкинд хандаж солиулах боломжоор хангагдсан байна. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com