Монгол Улсын бизнес регистрийн санд бүртгэлтэй аж ахуйн нэгжүүдийн тал хувь нь идэвхитэй үйл ажиллагаа явуулдаг болохыг Үндэсний Статистикийн хорооноос мэдээллээ. Гуравдугаар улирлын байдлаар Монгол Улсын хэмжээнд 95.7 мянган аж ахуйн нэгж бизнес регистрийн санд бүртгэлтэй байгаагаас 53 мянга нь идэвхитэй үйл ажиллагаа явуулж байгаа бол 44.6 хувь нь зах зээлд идэвхигүй байгаа ажээ. Үйл ажиллагаа явуулаагүй бүртгэлтэй аж ахуйн нэгжүүдийн 12.1 мянга буюу 28.4 хувь нь ямар нэг үйл ажиллагаа эрхлээгүй, 54.3 хувь нь түр зогссон, 1.7 хувь нь бүрэн зогссон, 15.6 хувь нь хаяг тодорхойгүй болон бүртгэл бүрэн бус байгаа юм байна. Харин үйл ажиллагаа явуулж байгаа байгууллагуудын 84 хувь нь буюу дийлэнх нь 1-9 ажилчинтайгаар зах зээлд оролцож байгаа бол 7.1 хувь нь 10-19, 5.5 хувь нь 20-49 ажилчинтай байна. Жижиг дунд үйлдвэрлэл нь бизнесийн гол цөмыг бүрдүүлсэн хэвээр байгаа бөгөөд есдүгээр сарын байдлаар үйл ажиллагаа явуулж байгаа аж ахуйн нэгж, байгууллагуудын хамгийн бага хэмжээ буюу 3.4 хувь нь 50-иас дээш ажилчинтай байна. Жижиг дунд үйлдвэр болон бизнес нь үндэсний нийт бүтээгдэхүүний үйлдвэрлэл болон борлуулалтын 30 гаруй хувийг үйлдвэрлэж, орлогын болон худалдааны татварын 20 орчим хувийг бүрдүүлж иржээ. Гуравдугаар улирлын байдлаар Монгол Улсын бизнес регистрийн санд бүртгэлтэй аж ахуйн нэгжүүдийн 32.3 мянга буюу 60.9 хувь нь Улаанбаатар хотод байгаа бол Төвийн бүсэд хамгийн их буюу зургаан мянган аж ахуйн нэгж, зүүн бүсэд хамгийн бага буюу 2.3 мянган аж ахуйн нэгж бүртгэлтэй байна.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com