Монгол Улсын нийт нутаг дэвсгэрийн 50 орчим хувь нь гангийн байдалтай байгаа болохыг Засгийн газраас мэдээллээ. 21 аймгаас Баян-Өлгий, Баянхонгор, Говь-Алтай зэрэг есөн аймагт зуншлага хэвийн, 12 аймгийн 133 сумын 66 нь гантай, 67 нь гандуу байгаа болохыг Улсын Онцгой комиссын ээлжит хурлаар хэлэлцсэн байна. Гандуу болон гантай байгаа аймаг сумдын тоо нэмэгдэж байгаатай холбогдуулан үр тарианы гарц муудаж болзошгүй байгаа учраас гурилын нөөцийг хангалттай бүрдүүлж, үнийг тогтвортой байлгах ажлыг зохион байгуулах, өвөлжих малын тоог цөөлөхөд анхаарч, махны нөөц, экспортыг нэмэгдүүлэх, малчдыг малаа даатгалд хамруулах ажлыг эрчимжүүлэх шаардлагатай байгааг Хүнс, хөдөө аж ахуйн сайд Р.Бурмаад анхааруулжээ. Мөн төлөвлөсөн ургацын 50-60 хувийг алдах эрсдэл байгааг Улсын комиссын хурлаар авч хэлэлцсэн байна. Энэ жилийн хувьд агаарын температур олон жилийн дунджаас 1- 2.5 хэмээр илүү байхаас гадна орох тунадасны хэмжээ төвийн нутгаар бага байх бол зуны улирлын дунд үед хүчтэй халж, намрын эхэн сард харин нойтон цас орох төлөвтэй байгааг Цаг Уур, Орчны Шинжилгээний газраас мэдээллээ. Дэлхийн түүхэн дэх хамгийн халуун жил тохиож байгаа учраас ОХУ-ын зарим бүс нутагт гангийн улмаас онц байдал зарлаад байна. Харин Европ, Бразил, Энэтхэгт хэт халалтын улмаас ургац алдах эрсдэл тулгараад байгаа төдийгүй Энэтхэг, Пакистанд хэт халалтын улмаас олон мянган хүн амь насаа алдаад байна.

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com