Монгол Улсын Ерөнхийлөгч Ц.Элбэгдорж УИХ-ын чуулганы нэгдсэн хуралдаанд оролцож цаг үеийн асуудлаар мэдээлэл хийлээ. Тэрбээр энэ удаад байгалийн гамшигт үзэгдэл, ялангуяа газар хөдлөлтийн гамшгийн үед бэлтгэлтэй байх, УИХ, Засгийн газар бусад холбогдох байгууллагууд гээд шат шатандаа нэгдсэн нэг ойлголттой байх шаардлага тулгараад байгаа гэдгийг дурдлаа. Мөн иргэдэд мэдээ, мэдээллийг хурдан шуурхай, үнэн зөв байдлаар хүргэх явдал чухал гэдгийг онцолжээ. Эргэн сануулахад өнгөрсөн амралтын өдрүүдэд нийслэл хот орчимд 4.4 магнитудын хүчтэй газар хөдлөлт болсон юм. Онцгой Байдлын Ерөнхий Газраас нурах эрсдэлтэй барилга, байгууламжид үзлэг шалгалтыг зохион байгуулахад ямар нэгэн эвдрэл гэмтэл илрээгүй гэж мэдээлжээ. Үүнээс гадна Засгийн гзарын “Шийдлийн цаг” уулзалтаар дээрх асуудлыг хөндөж, Газар хөдлөлтийн аюулаас урьдчилан сэргийлэх төлөвлөгөөг шинэчлэх үүргийг Ерөнхий сайд холбогдох албаныханд үүрэг болголоо. Ард, иргэд газар хөдлөлтийн мэдээллийг хожуу авч байгаагаас гадна урьдчилан сэргийлэх ойлголт тааруу байгаа, гэнэтийн аюулаас урьдчилан сэргийлэх сургалтыг жил бүр зохион байгуулдаг ч үр дүн муутай байна гэж Ерөнхий сайд үзэж байна. Тиймээс ямар ч аюул, байгалийн үзэгдэл тохиолдсон улс орон, иргэд бэлэн байх ёстой талаар Ерөнхий сайд холбогдох албаныханд онцгой анхааруулжээ. Одон орон геофизикийн судалгааны хүрээлэнгийн мэдээлснээр он гарсаар Улаанбаатар хотын хэмжээнд их бага хэмжээгээр нийт 896 удаа газар хөдөлсөн байна. Мөн жил ирэх бүр газар хөдлөлтийн давтамж болон хүч, нэмэгдэж байгааг анхааруулжээ. Харин Онцгой Байдлын Ерөнхий Газраас өгсөн мэдээллээр урьдчилан сэргийлэх арга хэмжээг авахын тулд шинээр таван станц барьж байгуулах, зарлан мэдээлэх дохиог шинээр нэмэхэд зарцуулах 3.9 тэрбум төгрөгийг төсөвт суулгах шаардлагатай гэж мэдээллээ.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com