2013 оны гуравдугаар улирлын эцсийн байдлаар Монгол Улсын нийт гадаад өрийн хэмжээ 18.2 тэрбум ам.доллар болж өнгөрсөн оны гуравдугаар улиралтай харьцуулахад 38 хувиар өссөн байна. Өнгөрсөн 2006 онд Монгол Улсын нийт гадаад өрийн хэмжээ 1.4 тэрбум ам.доллар байжээ. Гадаад өрийн дийлэнх хувийг буюу 56.6 хувийг гадаадын шууд хөрөнгө оруулалттай компани хоорондын авлага бүрдүүлж байгаа бол 23.3 хувийг Засгийн газрын өр, 6.1 хувийг банкны секторын өр бүрдүүлж байна. Сүүлийн таван жилийн хандлагаас харахад гадаад өрийн нийт хэмжээ 10 дахин нэмэгдсэн боловч энэ нь Монгол Улсад үйл ажиллагаа явуулдаг гадаадын шууд хөрөнгө оруулалттай компанийн толгой компаниасаа авсан хөрөнгө оруулалт 10 дахин өссөнтэй холбоотой ажээ. Харин Монголын хувийн хэвшлийн аж ахуйн нэгжүүдийн хувьд 2006-2007 онд олон улсын хөрөнгө оруулагчдаас ихэвчлэн урт хугацаат зээл авч байсан байна. Гэхдээ энэхүү хандлага 2009 оноос өөрчлөгдөж богино хугацаат зээл мөн 2011 оноос олон улсын зах зээлд урт хугацаатай бонд гаргах болжээ. Банкны секторын гадаад өр гуравдугаар улирлын эцсийн байдлаар 1.1 тэрбум ам.доллартай тэнцэж байгаа нь урт хугацаат өрийн бичгээс бүрдэж байгаа юм. Тэгвэл Засгийн газрын гадаад өр 2006 оноос хойш өнөөдрийг хүртэл 2.8 дахин буюу харьцангуй бага хувиар нэмэгджээ. Монгол Улсын Засгийн газрынын нийт гадаад өрийн 45 хувь нь Хөгжлийн банкны бонд болон Чингис бондын хөрөнгө байгаа юм. Харин үлдсэн өр нь хөнгөлөлттэй нөхцлөөр авсан зээл байна. 2014 оноос Засгийн газар өрийн удирдлагын тогтолцоог шинэчлэхээр хуулийн төсөл боловсруулаад байгаа юм. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com