Индонезийн Жакарта болон Палембанг хотод болж буй Азийн спортын XVIII их наадамд Монгол Улсын баг тамирчид медалийнхаа чансаагаар есдүгээр байрт бичигдэж байна.

Монгол Улсын тамирчид чөлөөт бөхийн төрөлд хоёр алт, нэг мөнгө, гурван хүрэл, буудлагын төрлөөс нэг хүрэл медаль хүртээд байна.

Тэмцээний эхний өдөр чөлөөт бөхийн эрэгтэйчүүдийн 57 кг-ын жинд Гавьяат тамирчин Э.Бэхбаяр алтан медаль хүртэж, Монгол Улсын баг тамирчдын медалийн салхийг хагалсан юм.

18 дахь удаагийн Азийн спортын их наадмын чөлөөт бөхийн тэмцээний хоёр дахь алтан медалийг 62 кг-ийн жинд өрсөлдсөн Монгол Улсын Гавьяат тамирчин П.Орхон эх орондоо авчирлаа. Тэрбээр шигшээ барилдаанд Киргизийн бөхийг 11:0-ийн харьцаатай илүүрхэн яллаа.

Чөлөөт бөхийн 57 кг-ийн жинд Олон улсын хэмжээний мастер А.Батцэцэг, 53 кг-ийн жинд Олон улсын хэмжээний мастер Э.Сумъяа нар тус тус хүрэл медалийн болзол хангалаа. Мөн чөлөөт бөхийн 68 кг-ийн жинд өрсөлдсөн Олон улсын хэмжээний мастер Ш.Түмэнцэцэг Азийн наадмын аваргын төлөө БНХАУ-ын бөхтэй барилдсан ч ялагдал хүлээж мөнгөн медаль хүртэв.

Үүнээс гадна "Жакарта 2018" Азийн спортын их наадмын 10 метрийн хийн урт бууны эмэгтэйчүүдийн төрөлд өрсөлдсөн Г.Нандинзаяа хүрэл медаль хүртсэн юм.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com