“COVID-19”-өөс үүдэлтэй эдийн засгийн хямрал Монголын Хөрөнгийн биржид бүртгэлтэй даатгалын компаниудад нөлөөлж байна. Тухайлбал: зах зээлийн нөхцөл байдлаас үүдэн “Монгол даатгал” ХК 2020 оны төлөвлөгөөнийхөө гол үзүүлэлтүүдийг 13-15 хувиар бууруулсан гэж мэдээллээ.

Мөн гуравдугаар сараас эхлэн зайнаас ажиллах зохицуулалтууд хийж, зарим ажилтнуудынхаа ажиллах цагийг 50 хүртэл хувиар бууруулах зэрэг арга хэмжээ авсан байна. Мөн даатгал хийхэд болон даатгалын тохиолдлыг бүртгэхэд биеэр очих шаардлагыг багасгаж цахимаар, чатботоор, видео ассистент системийг нэвтрүүлж байгаа талаар онцоллоо.

Үүнээс гадна "Жолоочийн хариуцлагын даатгалын нөхөн төлбөрийг шуурхай шийдвэрлэх үүднээс хохирлын үнэлгээ, нөхөн төлбөр тооцоолох зэрэгт хиймэл оюун ухаан ашиглах системийн туршилтын хугацаа дууссан бөгөөд тавдугаар сарын нэгнээс зах зээлд нэвтрүүлнэ" гэж “Монгол даатгал” ХК мэдээллээ. Тус компани хувьцаат компани болсонтой холбоотойгоор 2019 оны 105 сая төгрөгийн цэвэр ашгаас ногдол ашиг хуваарилахгүй байхаар шийдвэрлээд байгаа юм.

Харин 2019 онд цэвэр ашиг нь 50 орчим хувиар өсөж, 5.9 тэрбум төгрөг хүрсэн “Мандал даатгал” ХК 2.5 тэрбум төгрөгийг ногдол ашигт хуваарилах шийдвэрээ энэ сарын 23-нд цахимаар болсон хувьцаа эзэмшигчдийн хурлаар танилцууллаа. Монголын Хөрөнгийн биржийн сүүлийн арилжаагаар “Мандал даатгал” ХК-ийн нэгж хувьцааны ханш 2.02 хувиар өсөж, 43.88 төгрөг болсон ч он гарснаас хойш 12.3 хувиар буураад байгаа юм.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com