Торонтогийн Хөрөнгийн биржид бүртгэлтэй хоёр компани энэ долоо хоногт I улирлын санхүүгийн тайлангаа гаргалаа.

“Алтан Цагаан овоо” ордын олборлолтоо эхэлсэн “Steppe Gold” компанийн бэлэн мөнгөний тэнцэл жилийн өмнөхөөс 2.7 дахин нэмэгдэж, 1.8 сая ам.доллар болжээ. Тус компани Үндэсний хөрөнгө оруулалтын сангаас гурван сая ам.долларын санхүүжилт татсан байна. Мөн Төв банканд 8.5 сая ам.доллароор үнэт металл борлуулаад байгаа юм.

Харин “Erdene Resource Development” компани “Баянхөндий” төслийн эцсийн ТЭЗҮ-ийг энэ оны дундуур танилцуулж, 2021 онд олборлолтоо эхлэхээр зорьж байна. Мөн шинээр илрүүлсэн “Хар морь” болон “Алтан нар” төслийн талбайд хэтийн төлөв бүхий өрөмдлөгийн талбайг тодорхойлжээ. Баянхонгор аймагт орших олборлолтын зөвшөөрлөө авсан хоёр төслийнх нь тухайд, “Баянхөндий” ордоос жилд 61 мянган унц алт, “Алтан нар” ордоос жилд 48 мянган унц алт үйлдвэрлэх боломжтой гэж тооцоолж байгаа ажээ.

Үүнээс гадна Монголын уул уурхайн салбарт үйл ажиллагаа явуулж байгаа хоёр компани өөр улсад үйл ажиллагаагаа идэвхжүүлэх алхам хийлээ. Тухайлбал: “Kincora Copper” Австрали дахь “Trundle” төслийн талбайд хийсэн алмазан өрөмдлөгийн ажлын эхний үр дүн эерэг гарсныг мэдэгдлээ. Тус компани Монголд “Хүрэл үнэг”, “Зүүн цагаан суварга” хайгуулын төсөлтэй.

Мөн “TerraCom” компани Өмнөд Африкт эрчим хүчний нүүрсний дөрвөн төсөл хэрэгжүүлдэг “Universal Coal”-ийн бүх хувьцааг худалдаж авахаар ажиллаж эхэлснээ зарлав. Тус компани Монгол дахь Баруун Ноён уул ордоо Сингапурын “Bridge Resources"-д хоёр ам.доллароор худалдаж, 15 сая ам.долларын өглөгийг нь шилжүүлэхээр болсон юм.

Т.Элиса | @elisa_elisat

Холбоо барих: elisa.t@bloombergtvmongolia.com

minjma.g@bloombergtvmongolia.com