2018 оны наймдугаар сард Төв банк 2.8 тонн алт худалдан авсан байна. Ингэснээр Монголбанкны худалдаж авсан алт оны эхний найман сарын байдлаар 12.2 тонн хүрч өмнөх оны мөн үетэй ижил түвшинд хүрээд байна. Оны эцэст худалдан авсан алтны хэмжээгээ өмнөх оныхоос 10 хувиар нэмэгдүүлж, 22 тоннд хүргэх зорилт тавиад байгаа юм. Алтны нөөц ашигласны татварыг “Алт” хөтөлбөрийн хүрээнд 2.5 хувь болгож хөнгөлсөн ч хугацаа нь 2019 онд дуусах юм. Энэхүү хөнгөлөлтийг 2019 оноос цааш сунгах шаардлагатай байгааг Төв банк онцолж байна. Ингэснээр алт тушаалтын хэмжээ өндөр түвшинд хадгалагдаж гадаад валютын албан нөөц нэмэгдэх боломжтой гэж мэдээллээ. Алтны татвар өндөр үед Төв банканд тушаасан алтны хэмжээ 2010 онд хоёр тонн хүртлээ буурч байсан байна. Харин татварын хэмжээ буурснаар алт тушаалт тогтвортой өсөж, өнгөрсөн онд түүхэн дээд түвшинд хүрсэн юм.

Алт үйлдвэрлэгчид Аж ахуйн нэгжийн орлогын албан татварын тухай хуульд гурван тэрбум төгрөгөөс дээш борлуулалтын орлоготой бол 25 хувийн татвар авдаг нь татварын дарамт нэмдэг аж. Мөн зарим тохиолдолд лицензийг хүчингүй болгосноор алт олборлолтын үйл ажиллагаа удааширдаг байна. Холбогдох газруудын зүгээс олон удаа шаардлагагүй хяналт шалгалт хийдэг зэрэг хүндрэлүүдийг Төв банкны удирдлагуудад уламжилж байсан юм.

Гадаад валютын албан нөөц энэ оны долоодугаар сард 2.9 тэрбум ам.долларт хүрсэн нь өнгөрсөн оноос гурав дахин өссөн үзүүлэлт болж байна. Гадаад валютын албан нөөц ийнхүү өсөхөд алт тушаалтын хэмжээ, “Өргөтгөсөн санхүүжилтийн хөтөлбөр”-ийн хөрөнгө оруулалтууд голлон нөлөөлсөн аж. Энэ онд Төв банк алт тушаалтаас 700 сая ам.доллар гадаад валютын албан нөөцийг зузаатгахаар төлөвлөжээ.

Б.Бямбасүрэн

Холбоо барих: byambasuren.b@bloombergtvmongolia.com

minjma.g@bloombergtvmongolia.com