2019 оны эхний найман сарын байдлаар Монголбанк есөн тонн 649 кг алт худалдаж авсан байна. Төв банкны худалдаж авсан алтны хэмжээ өмнөх оны мөн үеэс 2.5 тонноор бага байгаа юм.

Ашигт малтмалын нөөц ашигласны төлбөртэй холбоотой хууль эрх зүйн тодорхойгүй байдал оны эхний гурван сард тушаагдсан алтны хэмжээг огцом бууруулжээ. Хууль батлагдсаны дараа алт худалдан авалт эргэн өссөн ч өмнөх оны гүйцэтгэлээс бага байгаа юм. Нөгөө талд дэлхийн зах зээлд алтны спот ханш он гарснаас хойш 20 орчим хувиар өсөж, сүүлийн байдлаар 1524 ам.доллар хүрчээ. Монголбанк алт худалдаж авсан эх үүсвэрээс гадаад валютын албан нөөцийг жил бүр 700-800 сая ам.доллароор нэмэгдүүлсэн гэж Монголбанкны Ерөнхийлөгч Н.Баяртсайхан мэдэгдсэн юм.

Энэ онд худалдаж авах алтны хэмжээг өмнөх оныхоос бууруулахгүй байх зорилт тавиад байна. Оны эхний хагас жилийн байдлаар гадаад валютын албан нөөцийн хэмжээ өмнөх оноос 37 хувиар өсөж, 4.1 тэрбум ам.доллар хүрээд байгаа ч долоодугаар сард эргэн 11 хувиар буурч, 3.6 тэрбум ам.доллартой байна. Долоодугаар сард гадаад валютын албан нөөц буурахад улирлын чанартай импортын эрэлт өссөн, төлбөрийн тэнцэл алдагдалтай байсан зэрэг голлон нөлөөлсөн гэж Төв банк тайлбарлалаа.

Б.Бямбасүрэн| @byambasuren_b

Холбоо барих: byambasuren.b@bloombergtvmongolia.com

minjma.g@bloombergtvmongolia.com