Төрөөс мөнгөний талаар баримтлах 2015 оны үндсэн чиглэлийн төслийг хэлэлцэхийг УИХ дэмжээд байна. Ирэх оны мөнгөний бодлогын үндсэн чиглэлийг боловсруулахдаа инфляцийг долоон хувиас хэтрүүлэхгүй байх, эдийн засгийн гадаад тэнцвэрийг хангах үндсэн зорилтыг дэвшүүлсэн юм. 2014 онд гадаад худалдаа тэнцвэржих хандлагатай байгаа боловч гадаадын шууд хөрөнгө оруулалт сэргээгүй, гадаад актив буурсан, төлбөрийн нийт тэнцэл сайжраагүй хэвээр байгааг Монголбанк онцолж байна. Сүүлийн 20 сарын хугацаанд төлбөрийн нийт тэнцэл дотоодын нийт бүтээгдэхүүний 24 хувьтай тэнцэх хэмжээний алдагдалтай гарч, Монгол Улсын гадаад цэвэр актив 5.3 их наяд төгрөгөөр буураад байгаа аж. Мөн 2011-2012 оны дунджаар гадаадын шууд хөрөнгө оруулалт дотоодын нийт бүтээгдэхүүний 40 гаруй хувийг бүрдүүлж байсан бол 2013 онд 16 хувь, 2014 оны эхний хагаст найман хувьтай тэнцэх хэмжээнд очиж огцом буурсан байна. Тиймээс ирэх онд төлбөрийн тэнцлийн алдагдлыг бууруулах, санхүүгийн тогтвортой байдлыг хангахад чиглэсэн мөнгөний болон төсвийн хосолсон бодлого хэрэгтэй гэж эдийн засагчид үзжээ. Хэдийгээр мөнгөний бодлогод шаардлагатай арга хэмжээг авахыг тусгасан боловч төсвийн гадуурх зардлыг тодорхой болгох, мөнгөний нийлүүлэлтийг зохистой түвшинд байлгах шаардлагатайг онцолсон юм. Харин орон сууцны тогтвортой тогтолцоог бүрдүүлэхээс бусад салбарын үнэ тогтворжуулах дэд хөтөлбөрүүдийг 2015 оноос үе шаттайгаар дуусгах зарчим баримталж байгааг Төвбанк мэдээллээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com